Ubu USA ni yo ifite benshi bishwe na COVID-19 ku Isi

Leta Zunze Ubumwe za Amerika ubu zatambutse u Butaliyani mu kugira umubare wa mbere munini ku isi w’abamaze kwicwa n’icyorezo cya Coronavirus.

Imibare mishya yatangajwe na Kaminuza ya Johns Hopkins yo muri Amerika igaragaza ko abantu barenga 20,000 imaze kubica muri icyo gihugu.

Uyu muhigo mubi Amerika iwuciye nyuma gato yaho iki gihugu kibaye n’icya mbere ku isi kirengeje abantu 2,000 coronavirus yishe mu munsi umwe.

Andrew Cuomo, Guverineri wa leta ya New York, ejo ku wa Gatandatu yavuze ko umubare w’abo yica muri iyo leta usa n’uwatangiye guhama hamwe.

Ubwo yatangazaga umubare mushya w’abantu 783 bashya iyo virusi yishe mu masaha 24 ashize, yavuze ko mu minsi myinshi ishize umubare w’abo yica muri iyo leta wakomeje kuba hafi muri iyo mibare.

Bwana Cuomo yagize ati "Aba si bo ba mbere benshi [yishe], kandi mushobora kubona ko umubare hari ukuntu uri kugenda uhama hamwe, ariko uri guhama hamwe mu buryo buteye ubwoba".

"Iyi ni imibare udashobora kwiyumvisha igaragaza igihombo kinini n’akababaro".

Iyi leta ya New York ni yo yabaye izingiro rya Coronavirus muri Amerika, muri yo habaka hamaze kwemezwa abanduye coronavirus barenga 180,000 mu bamaze kwandura bose bagera ku 520,000 mu gihugu.

Kugeza ejo ku wa gatandatu, buri leta yo muri Amerika yari yatangaje ko iri mu bihe by’amakuba kubera coronavirus.

Kugeza ejo ku wa gatandatu nyuma ya saa sita kandi, u Butaliyani bwari bumaze gutangaza abantu 19,468 bamaze kwicwa na Coronavirus muri icyo gihugu bose hamwe.

Mu gihe Amerika yo yari igeze ku bantu 20,506 bamaze kwicwa na Coronavirus bose hamwe, nkuko imibare ya Kaminuza ya Johns Hopkins ibigaragaza.

Abantu barenga 100,000 ku isi bamaze kwicwa na Coronavirus kuva yakwaduka mu Bushinwa mu kwezi kwa cumi na Kabiri k’umwaka ushize, naho abarenga 400,000 bamaze kuyikira.

Abanyamakuru bati “Amb Olivier Nduhungirehe noneho arahungira he”, iyumvire ubusesenguzi bwabo muri iyi Video utapfa gusanga ahandi:





Tanga igitekerezo kuri iyi nkuru



Igitekerezo