USA yemeje kuvuza ‘Plasma’ y’amaraso abanduye COVID-19

Ikigo gishinzwe imiti cya Amerika (FDA) cyemeje ko mu buryo bwihutirwa gusa hakoreshwa Plasma mu kuvura abarwaye Coronavirus.

Plasma ni ibisukika bijya gusa n’umuhondo biba mu maraso, niyo igendamo ingirangingo (cells) na proteins bikwira mu mubiri.

Kuvuza plasma ivanywe mu mubiri w’abantu bakize coronavirus, bimaze gukoreshwa ku barwayi 70,000 muri Amerika.

Ikigo FDA kivuga ko amagerageza yakozwe yerekana ko ubu buryo ntacyo butwaye, nubwo hagikenewe andi ashimangira ko buvura neza.

Gusa hari inzobere nyinshi zagaragaje gukemanga ingano y’amageragezwa yakozwe kuri ubu buryo.

Kwemeza ubu buvuzi bibaye nyuma y’uko Perezida Donald Trump anenze ikigo FDA gutinza gutanga inkingo ku mpamvu za politiki.

Ubu buvuzi bumaze kwemezwa, Bwana Trump yabwiye abanyamakuru ati:

"Ibi nibyo nari ntegereje igihe kinini gishize, nishimiye kubabwira ikintu gikomeye kizakiza abantu benshi mu rugamba rwacu rwo kurwanya iyi virus y’u Bushinwa."

Bwana Trump yavuze ko ubu buvuzi bifite imbaraga, anasaba Abanyamerika bakize Covid-19 gutanga plasma yabo.

Abanyamerika 176,000 bamaze kwicwa na Covid-19 kuva yahagera nk’uko bivugwa na kaminuza ya Johns Hopkins. Hafi miliyoni 5.7 barayanduye, nicyo gihugu gifite benshi banduye n’abo yishe ku isi.

Ubuvuzi bwa plasma burakora?

Ikigo FDA na mbere cyari cyeremeje gukoresha Plasma ku barwanyi bamwe na bamwe, nk’abarembye cyane cyangwa se abari gukorerwaho ubushakashatsi.

Ubu iki kigo cyatanze "uruhushya aho byihutirwa" rwo kuyikoresha, aho gutanga uruhushya rwuzuye.

Kivuga ko ubushakashatsi bw’ibanze bwerekana ko Plasma igabanya impfu kandi igatuma abarwayi boroherwa iyo bayitewe mu minsi itatu ya mbere bashyizwe mu bitaro.

Gusa kivuga ko amagerageza yisumbuyeho agikenewe ngo byemezwe neza ko Plasma ivura.

FDA yanzura ko ubu buryo ntacyo butwaye nyuma yo kureba ibyavuye mu igeragezwa ryakozwe ku barwayi 20,000 bayihawe.


Plasma iva mu bakize Covid-19 ishobora kuba ikungahaye mu birinda umubiri, byafasha mu kuvura abandi

Iki kigo kivuga ko abantu bari munsi y’imyaka 80 batari ku byuma bibafasha guhumeka, bahawe plasma irimo ibirinda umubiri byinshi yabafashije cyane, ikagabanya impfu kuri 35% mu kwezi nyuma yo kuyihabwa, kurusha abahawe plasma irimo ibirinda umubiri bicye.

Peter Marks wo mu kigo cy’ubushakashatsi cya FDA ati "Biraboneka ko ubu buryo ntacyo butwaye, dukomeje kubona ibimenyetso ko ari bwiza."

Mu byo we yavuze, Bwana Trump yavanyeho izindi ngingo z’ikigo FDA gikomeje ubushakashatsi, avuga ko plasma "igabanya impfu ku gipimo cya 35%".

Abahanga benshi, barimo Dr Anthony Fauci uri mu kanama ka White House ko kurwanya Coronavirus, bagiye bashidikanya ingano y’amagerageza yakozwe ku gukoresha plasma.

Amakuru mashya ku nkingo?

Ku wa Gatandatu, Bwana Trump yanditse kuri Twitter anenga ko FDA iri gutambamira kompanyi zikora imiti kugerageza inkingo n’imiti.

Yagize ati "Biraboneka ko bashaka ko igisubizo kizaboneka nyuma [y’amatora ya perezida]".

Hagati aho, ikinyamakuru Financial Times kivuga ko ibiro bya Perezida wa Amerika bishobora kwemeza mu buryo bwihutirwa urukingo ruri gukorwa na kaminuza ya Oxford na kompanyi ya AstraZeneca mbere y’amatora yo mu kwezi kwa 11.

White House ntacyo iratangaza kuri iyi nkuru, gusa umuvugizi wa AstraZeneca yabwiye Reuters ko ibisubizo by’igerageza niba urukingo rwabo rukora bizaboneka mu mpera z’yu mwaka.


Umunyamerika uri gutanga plasma nyuma yo gukira Covid-19

Umuvugizi w’ishyaka rya DALFA Umurinzi ati "Yuzuye ingengabitekerezo ahubwo akwiye gufungwa hamwe n’agatsiko ke", byose urabyiyumvira muri iyi Video utapfa gusanga ahandi:





Tanga igitekerezo kuri iyi nkuru



Igitekerezo