USA: Imyigaragambyo ikomeye y’abamagana iyemezwa ry’intsinzi ya Biden

Mu gihe kuri uyu wa Gatatu tariki ya 06 Mutarama 2021, abagize Inteko Ishinga Amategeko ya Leta Zunze Ubumwe z’Amerika imitwe yombi, ni ukuvuga Abadepite n’Abasenateri byitezwe ko bemeza intsinzi ya Joe Biden mu matora aheruka, ubu hari imyigaragambyo iri gukorwa n’abashyigikiye Trump.

Abadepite n’Abasenateri barahurira mu Nteko Rusange kugira ngo bongere babarure ndetse bemeze amajwi yavuye mu ntumwa zitora zizwi nka Electoral College.

Hari aba Repubulika biyemeje gushyigikira Perezida Donald Trump mu nzira ye yo gushaka guhindura ibyavuye muri ayo matora, aho byitezwe ko muri iyo Nteko Rusange baza kwamagana ibyayavuyemo.

Gusa abashinzwe umutekano bashobora kutaza kuborohera kuko ubu mu gihugu habarurwa amajana yabo bitezwe gufasha muri iki gikorwa.

Abashyigikiye Perezida Trump batangiye kwiyegeranya i Washington DC kugira ngo bakore imyigaragambyo yo kwamagana icyo gikorwa cyo kwemeza ibyavuye mu matora, bikaba byitezwe ko ku rundi ruhande haza kuba n’indi myigaragambyo irwanya iyi y’abashyigikiye Trump.

Mu butumwa bwe yacishije ku rubuga rwa Twitter ejo ku wa Kabiri, Perezida Trump yatangaje ko avuga ijambo muri iyo myigaragambyo yiswe "SAVE AMERICA RALLY" (Imyigaragambyo ya garukira Amerika).

Kugeza ubu Trump ntaremera ko yatsinzwe mu matora yo ku wa 03 Ugushyingo umwaka ushize, avuga ko yabayemo ubujura ariko ntatange ibimenyetso byemeza ibyo avuga.

Joe Biden wo mu ishyaka ry’Abaharanira Demokarasi (Democrats) yitezwe gushyikirizwa ubutegetsi ku wa 20 z’uku kwa mbere.

Hari impande ebyiri mu ishyaka ry’abaRepubulikani, aho hari bamwe mu badepite babarirwa muri mirongo bari kumwe n’agatsiko gatoya k’abasenateri biteze kwanga ibyavuye mu matora mu mareta amwe amwe adafite uruhande abogamiyeho.

Ted Cruz uyoboye itsinda ry’abasenateri bashyika hafi ku icumi, basaba ko hashyirwaho igihe cy’imisi icumi cyo kubanza kwiga ibyo by’ubujura bivugwa muri ayo matora.

Visi-Perezida, Mike Pence nk’umukuru wa Sena akaba ari we witezweho kuba araba ayoboye iyi nama akanatangaza intsinzi ya Biden, avuga ko yakirije yombi iyi ngingo.

Yahagaritse ibyo gusubiramo ibirego by’ubujura buvugwa na Trump ariko umukuru w’ibiro bye avuga ko yumva "impungenge z’amamiriyoni y’Abanyamerika ku bijanye n’ubujura bw’amatora ndetse no kutubahiriza amategeko".

Nk’uko itegeko ry’amatora muri Amerika ribivuga, igikorwa cya Pence muri iyo nama ni uguhagarikira gusa uburyo ibintu bigenda, ariko Trump yasabye uyu Visi-Perezida we kwihagararaho.

Iyo hari ibirego byemejwe n’umwe wo mu Nteko Ishinga Amategeko umutwe w’Abadepite hanyuma hakaba n’umwe wo muri Sena ubishigikira, bitegerezwa kuganirwaho mu Nteko Rusange y’amasaha abiri ikurikirwa n’amatora.

Ariko, kugira ngo icyo kirego cyemerwe, ni uko haba umubare mwinshi w’Abadepite n’abasenateri bacyemeza.

Aba Repubulikani ni bo biganje muri Sena ariko bamwe muri bo bamaze kwiyemeza ko batazaba inzitizi ku byavuye mu matora, ni mu gihe aba Democrats ari bo biganje mu mutwe w’Abadepite.

Umukuru w’aba Repubulikani muri Sena, Mitch McConnell yamaze kwemeza intsinzi ya Biden mbere anasaba abandi baRepubulikani kureka kwihambira ku bigaragara.

Ibijyanye n’iyi myigaragambyo

Ibihumbi n’ibihumbi by’abarwanashyaka ba Trump, harimo n’abagendera ku matwara akaze ya kizungu, biteze kwitabira iyi myigaragambyo i Washington, mbere bakaba batangiye kwiyegeranya nijoro ku wa Kabiri.

Umwe muri bo yabwiye Ibiro Ntaramakuru Associated Press ati "Ndi ahangaha kugira ngo nshyigikire umukuru w’igihugu. Sinzi neza icyo ashobora gukora muri uyu mwanya, ariko ndashaka kumva ijambo avuga".

Bamwe mu bategetsi basabye abashyigikiye Trump ko batakwitwaza intwaro.


Aba ni abashyigikiye Perezida Trump batangiye kwiyegeranya i Washington DC kugira ngo bakore imyigaragambyo mbere y’Inteko Rusange y’Inteko Ishinga Amategeko imitwe yombi

Victoire yabeshyuje uwamwiyitiriye akavuga ko asheshe ishyaka rye! Abakirisito ba ADEPR bandikiye RGB bayibaza itegeko yakurikije ishyiraho ubuyobozi buriho muri iri Torero:





Tanga igitekerezo kuri iyi nkuru



Igitekerezo