USA: Abanyeshure barokotse ubwicanyi bahagurukiye ubutegetsi bwa Trump

Abanyeshuri bo ku ishuri ryisumbuye rya Marjory Stoneman Douglas muri Leta ya Florida ahiciwe abantu 17 mu cyumweru gishize, batangaza ko batazacika intege mu gukomeza guhangana n’ubutegetsi bwa Trump bashingiye ko Abadepite b’iyo Leta banze kwemeza itegeko rikuraho kugurisha intwaro zikomeye ku baturage.

Abashinzwe amategeko muri Leta ya Florida baganje abo mu ishyaka ry’Abarepublikani bo banze kwemeza iryo tegeko, bashinja Abademokrate kuzana icyo kibazo cy’imbunda zikomeye nyuma y’ubwo bwicanyi bwakozwe n’umusore w’imyaka 19 ariwe Nikolas Cruz mu gihe cyagombaga kuba cyarakemuwe mbere.

Abanyeshuri bagera ku 100 barokotse ubwo bwicanyi bwabaye kuri iryo shuri bari bitezwe mu Mujyi wa Tallahassee, umurwa mukuru wa Leta ya Florida kuri uyu wa gatatu, aho Perezida Trump yagombaga kubonanira n’ababyeyi, abarimu n’abanyeshuri. Gusa ibiro bya White House byari byatangaje ko Perezida Trump yiteguye kubatega amatwi ku kibazo cy’umutekano ku mashuri.

PNG - 723.4 kb
Aha abanyeshuri bo ku ishuri rya Marjory Stoneman Douglas barimo bakurikirana Abadepite ba Leta ya Florida barimo biga ku itegeko rijyanye n’intwaro ziremereye.


Abarokotse muri ubwo bwicanyi i Parkland, n’abarokotse mu bundi bwicanyi bwabaye mu mashuri y’ i Sandy Hook na Columbine, na bo bari batumiwe muri uwo mubonano na Perezida Trump.

Abo banyeshuri kandi ngo bateganya kuzigaba mu mihanda i Washington DC ku itariki ya 24 z’ukwezi kwa gatatu, urugendo rwiswe “March for Our Lives” (mu Cyongereza), bisobanura “Urugendo kubw’ubuzima bwacu" mu ntumbero yo kwamagana amategeko bo bavuga ko yorohereza abicanyi.

Umuyobozi wa Leta ya Florida Rick Scott nawe ateganya kubonana n’abo banyeshuri mu mpera z’iki cyumweru.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo