U Rwanda rwatangiye gukingira ’abafite ibyago byo kwandura’

Gahunda yo gukingira Covid-19 mu Rwanda yatangiriye ku bafite ibyago byo kwandura kurusha abandi by’umwihariko abita ku barwaye iyi virus mu mavuriro, nk’uko byatangajwe na minisiteri y’ubuzima.

Minisiteri y’ubuzima ivuga ko iri gukoresha inkingo zemewe na OMS/WHO u Rwanda rwabonye ku mubare muto "binyuze mu bufatanye mpuzamahanga".

Minisiteri y’ubuzima ntiyatangaje urukingo ruri gutangwa, gusa umwe mu bakozi bayo yabwiye BBC ko batangiye gukingira muri iki cyumweru, batera urukingo urwa Pfizer.

Muri aka gace ka Africa u Rwanda nicyo gihugu kibanjirije ibindi gukingira Covid. Muri Africa, ibihugu ubu byatangiye gutanga urukingo birimo Maroc, Mauritius, Equatorial Guinea, Misiri na Seychelles.

Abategetsi mu Rwanda bavuga ko muri uku kwezi biteguye kwakira inkingo zivuye muri gahunda mpuzamahanga ya Covax hamwe n’umuryango wa Africa yunze ubumwe.

Itangazo minisiteri y’ubuzima yacishije ku rubuga rwa Twitter rivuga ko izo nkingo niziboneka gahunda yo gukingira umubare w’abantu wisumbuyeho ari bwo izakurikiraho.

Ku munsi nk’uyu mu mwaka ushize, nibwo Misiri yatangaje umuntu wa mbere wanduye Covid-19, nibwo bwa mbere iyi ndwara yari igeze muri Africa.

Ubu Africa ihanganye n’ubwiyongere bwihuse bw’abandura n’abicwa n’iki cyorezo muri iyi minsi kubera amoko mashya y’iyi virus.

Ibihugu byinshi muri Africa bitegereje kubona inkingo muri uku kwezi muri gahunda ya Covax.

Byinshi muri ibi bihugu bizabona urukingo rwa AstraZeneca, ibihugu bine gusa - birimo u Rwanda - nibyo bizabona urukingo rwa Pfizer rwakozwe n’Abanyamerika bafatanyije n’Abadage.

Urukingo rwa AstraZaneca byavuzwe ko ruhendutse ndetse rworoshye kubikwa kuko rushobora kubikwa mu byuma bisanzwe bikonjesha.

Gusa ibihugu bimwe, nka Africa y’Epfo, byakemanze ubushobozi bw’uru rukingo mu gukingira amoko mashya ya Covid-19.

ABATURAGE BAKOZE IGISA N’IMYIGARAGAMBYO NYUMA Y’UKO RWIYEMEZAMIRIMO YANZE KUBISHYURA

BBC





Tanga igitekerezo kuri iyi nkuru



Igitekerezo