U Rwanda rwahawe amahirwe yo gukoresha ibibuga by’indege byose bya Togo

Aya masezerano yo mu rwego rw’uburenganzira bwa Ggatanu (Fifth Freedom), yasinywe kuri uyu wa Kabiri, yatumye ikompanyi z’indege z’ibihugu byombi zemererwa gusangira ikirere nta mananiza y’umubare ntarengwa w’ingendo cyangwa abagenzi buri imwe igomba gukura mu gihugu runaka.

Ubwo hasinywaga aya masezerano, Umunyamabanga wa Leta muri Minisiteri y’ibikorwa remezo ushinzwe ubwikorezi, Uwihanganye Jean de Dieu, yasobanuye ko akubiyemo ibijyanye no koroherezanya no gufungura ikirere hagati y’ibihugu byombi.

Yagize ati “Iby’ingenzi bikubiyemo ni uko uyu munsi igihugu cya Togo cyatwemereye uburenganzira bwo gukoresha ibibuga by’indege bya Togo, tukaba twacamo tujyanye n’abagenzi ahandi.”

Yakomeje avuga ko ubu burenganzira na Togo yabuhawe n’u Rwanda ku buryo ikompanyi y’iki gihugu ishobora kuhakorera ingendo cyangwa hakabaho ubufatanye hagati ya kompanyi z’ibihugu byombi.

Yagize ati “Amasezerano nk’aya iyo tuyasinye nk’igihugu nk’u Rwanda, ni muri ya gahunda yo gukomeza guteza imbere ubwikorezi bw’indege, no gufasha RwandAir kwagura ingendo zayo nk’uko biri muri gahunda ya Guverinoma y’imyaka irindwi.”

RwandAir isanzwe ifite igicumbi mu Burengerazuba bwa Afurika, muri Benin, aya masezerano aratuma iyi kompanyi izajya ikora ingendo Benin-Togo ikaba yakomeza no mu Rwanda.

Minisitiri ushinzwe ibikorwa remezo n’ubwikorezi muri Togo, Ninsao Gnofam, yavuze ko aya masezerano atuma RwandAir n’ikompanyi y’indege ihuriweho n’ibihugu byo muri Afurika y’Uburengerazuba, ASKY Airlines, zishobora gufatanya mu ngendo z’aho zisanzwe zijya.

Yagize ati “Aya masezerano aratuma ikompanyi z’indege z’ibihugu byacu byombi bikorera ku bibuga by’indege nta mananiza y’inshuro zitagomba kurenza cyangwa abagenzi. Ibi biratuma ubutwererane bukomeza kwiyongera.”

ASKY Airlines ifite icyicaro i Lomé muri Togo, ikorera mu bice byinshi bya Afurika y’Uburengerazuba n’iyo hagati mu byerekezo 23 birimo; Abidjan, Abuja, Accra, Bamako, Bangui, Bissau, Brazzaville, Conakry, Cotonou, Dakar–Diass, Douala, Kinshasa–N’Djili, Lagos, Libreville, N’Djamena, Niamey, Ouagadougou, Pointe–Noire na Yaoundé.

Kuba u Rwanda na Togo byafunguriranye amarembo mu bijyanye n’ubwikorezi bwo mu kirere bizoroshya ubuhahirane mu bikomoka ku buhinzi, ubukerarugendo n’ubucuruzi muri rusange.

Kugeza ubu u Rwanda rumaze gusinya amasezerano ajyanye n’ubufatanye mu ngendo zo mu kirere n’ibihugu 82 ku Isi, aho 37 ari byo byemeranyije n’u Rwanda gukorera ku bibuga byose by’indege no kuhakura abagenzi ikabajyana ahandi.





Tanga igitekerezo kuri iyi nkuru



Igitekerezo