U Rwanda rwahawe ’Robots’ zirufasha kuvura Covid-19-Amafoto

Minisiteri y’Ubuzima mu Rwanda yakiriye ’Robots’ eshanu zigiye gutangira gukora mu bigo bibiri bikurikirana abarwayi ba Covid-19, zakiriwe kuri uyu wa Kabiri tariki ya 19 Gicurasi 2020 nkuko iyi Minisiteri yabitangaje.

Akazuba, Ikirezi, Mwiza, Ngabo na Urumuri ni yo mazina y’izi ’robots’ zizakora mu gupima umuriro, guha abarwayi ibyo bakenera no kubika amakuru y’abarwayi ba Covid-19.

Ibi bikoresho by’ikoranabuhanga bisimbura abantu ku mirimo imwe n’imwe, Minisiteri y’Ubuzima ivuga ko bifite ubushobozi bwo gupima abantu hagati ya 50 na 150 mu munota umwe.

Minsitiri w’Ubuzima, Dr Daniel Ndamije yabwiye itangazamakuru ko izi ’robots’ zizafasha abaganga "gufata ibipimo bimwe, gutanga ibiryo n’imiti ku barwayi bari muri ibyo bigo n’ibindi".

Zishobora kandi kubwira abakozi bari ku kazi aho zibonye ibipimo bidasanzwe ku murwayi.

Mu bindi izi robots zikora harimo kuburira umuntu wambaye nabi agapfukamunwa, no guhuza umuganga n’umurwayi mu buryo bw’iyakure bwa ’Video Conference’ nkuko umukozi muri Minisiteri y’Ubuzima yabibwiye BBC.

Uyu mukozi avuga ko umumaro ukomeye w’izi ’robots’ ahanini ari ukugabanyiriza abaganga ibyago byo kwandura Covid-19 zibarinda guhura kenshi n’abarwayi.

Izi robots zizafasha kandi mu kubika amakuru y’abarwayi ku nyandiko abikwe mu buryo bugezweho no kwihutisha igihe byafataga gukora imirimo imwe n’imwe.

Mu cyumweru gishize, Minisiteri y’Ubuzima mu Rwanda yatangaje ko hari abaganga bamaze gutozwa gukorana n’izi ’robots’, ubu zazanwe ari eshanu.

Dr Ngamije yagize ati "Ku bigo bibiri dufite ubu [eshanu] zitanga umusaruro, dukeneye izindi ’robots’ mu bindi bikorwa nko gutera imiti yica za ’microbes’ ahahurira abantu benshi nazo turi gushaka uko zizaboneka".

Ibyo bigo ni ikigo kiri i Kanyinya hanze gato y’umujyi wa Kigali, ikindi i Nyamata mu karere ka Bugesera mu burasirazuba.

Kugeza kuri uyu wa Mbere tariki ya 18 Gicurasi 2020, mu Rwanda hamaze kuboneka abantu 297 banduye Covid-19 muri bo 203 barayikize nk’uko bivugwa na Minisiteri y’Ubuzima.

Ntabwo hatangajwe agaciro k’izi ’robots’, zikorwa n’uruganda rw’Ababiligi rwitwa Zorabots.


Zimwe muri ’robots’ Minisiteri y’Ubuzima ivuga ko zije gufasha abaganga kuvura Covid-19

Inzira y’umusaraba yo gufunga umuyobozi w’UMUBAVU.COM n’UMUBAVU TV ONLINE n’ikibyihishe inyuma:





Tanga igitekerezo kuri iyi nkuru



Igitekerezo