U Rwanda rugiye kwakira inkunga irufasha mu gukumira icyorezo cya Ebola

Umuryango w’Ubumwe bw’Ibihugu by’u Burayi (EU), watangaje ko ugiye guha u Rwanda na Uganda, inkunga bizifashisha mu gukumira ko icyorezo cya Ebola, cyagaragaye muri Repubulika iharanira Demokarasi ya Congo, cyabigeramo.


Mu minsi ishize nibwo Minisiteri y’ubuzima ya Congo yatangaje ko icyorezo cya Ebola cyongeye kugaragara ku butaka bwayo ku nshuro ya 10.

Ku wa 19 Nzeri, Ishami ry’umuryango w’abibumbye ryita ku buzima (OMS) ryatangaje ko mu bantu 143 bari bamaze kugaragaza ibimenyetso bya Ebola muri Congo, 112 ryemeje ko bayirwaye, 31 bashobora kuba bayirwaye.

Muri abo 112 yagaragayeho 66 barapfuye barimo imyeshyamba 39.

Itangazo EU yanditse ku rubuga rwayo kuri uyu wa Gatanu, rivuga ko ibinyujije mu muryango mpuzamahanga utabara imbabare (Croix Rouge), izaha u Rwanda na Uganda ibihumbi 100 by’amapound.

U Rwanda ruzahabwamo amapawundi ibihumbi 40 (asaga miliyoni 45 Frw) naho Uganda itwara asigaye, amapawundi ibihumbi 60. Ngo bizayifashisha mu bikorwa byo gukumira ko Ebola yabigeramo.

Umuyobozi ushinzwe ibikorwa by’ubutabazi, guhangana n’ibibazo no gukumira Ebola muri EU, Christos Stylianides, yasobanuye ko azifashishwa cyane cyane mu turere duhana imbibi na Congo.

Ati “Ntidushobora gutuza igihe hari ibibangamira ubuzima bw’abantu nka Ebola. EU iri maso mu gukumira ko ikomeza gukwirakwira no kwita kubo yagizeho ingaruka.”

Yakomeje agira ati “EU yateguye ingamba zo gufasha abagizweho ingaruka nayo, tubaha ubufasha bw’ibikoresho n’imiti. Inkunga tuzaha Croix Ruge y’u Rwanda n’iya Uganda izabafasha gushyiraho ingamba zikenewe mu kwirinda ko ihagera inyuze ku mipaka.”

Ubu bufasha buje bukurikira ibiganiro Stylianides yagiranye n’umuyobozi wa OMS, Dr. Tedros Ghebreyesus, ubwo bahuriraga mu nama rusange ya 73 ya Loni yo kuwa 23 Nzeri.

Ibiganiro byibanze ku buryo bwo gukumira ikwirakwira rya Ebola. Stylianides yashimangiye ko EU izaha OMS ubufasha bwose bushobaka.

Mu Rwanda nta murwayi cyangwa ufite ibimenyetso bya Ebola urahagaragara. Muri Kanama uyu mwaka, Minisitiri w’Ubuzima, Dr. Diane Gashumba, yavuze abanyarwanda badakwiye gukangarana bibaza ko Ebola izagera mu Rwanda.

Yagize ati “Ku butaka bw’u Rwanda nta Ebola ihari, ntayo ariko icyo tugomba kubwira abanyarwanda ni ugukomeza kwirinda. Ebola ni indwara idapfa kwandura. Kugira ngo umuntu ayandura, ni uko aba yakozweho n’uyifite cyangwa yahuye n’amatembabuzi y’uyirwaye.”

Yakomeje avuga ko Leta izakomeza gushyiraho ingamba zo gukumira ko yagera ku butaka bwayo, zirimo gupima abinjira mu gihugu bavuye mu gace yagaragayemo.

Mu minsi ishize Uganda nayo yemeje ko nta murwayi wa Ebola uragaragarayo, nyuma y’uko hari uwari ugaragaye ku nkombe z’ikiyaga cya Albert, gikora ku bihugu byombi (Uganda na Congo), bigakangaranya abantu.

umubavu.com





Tanga igitekerezo kuri iyi nkuru



Igitekerezo