U Bushinwa buramagana ko bwaba bubeshya kuri COVID-19

Minisiteri y’Ububanyi n’Amahanga y’u Bushinwa yahakanye amakuru avuga ko iki gihugu gitanga amakuru atari yo ku cyorezo cya Coronavirus gikomeje kujujubya Isi.

Raporo y’Umuryango w’Ubumwe bw’u Burayi yatangajwe mu cyumweru gishize ivuga ko hari "ibimenyetso bihagije" byo guhisha ibikorwa by’u Bushinwa ku mbuga nkoranyambaga.

Inzego z’umutekano mu Bwongereza no muri Amerika zivuga ko u Bushinwa bukomeje gutangaza amakuru agabanyije kandi atari yo ku bandura n’abicwa na Covid-19.

Uyu munsi ku wa Mbere mu kiganiro n’abanyamakuru, Geng Shuang, umuvugizi wa Minisiteri y’Ububanyi n’Amahanga y’u Bushinwa yahakanye ibyo bivugwa.

Yagize ati "U Bushinwa buramagana guhimba no gukwiza amakuru atari yo bikozwe n’umuntu cyangwa urwego. U Bushinwa si bwo buvuga amakuru atari yo ahubwo nibwo buvugwaho amakuru atari yo".

Covid-19 yabonetse bwa mbere mu mpera z’umwaka ushize i Wuhan mu Bushinwa ikwirakwira ku isi vuba kuko ubu imaze kugera mu bihugu 185.

Ubu tuvugana abamaze kumenyekana ko banduye iyi ndwara ku isi, baregera miliyoni 3 kuko bamaze kuba 2,989,090 ikaba imaze kwica abagera kuri 207,431 naho abarenga ibihumbi 875 bamaze kuyikira.


Umuvugizi wa Minisiteri y’Ububanyi n’Amahanga y’u Bushinwa, Geng Shuang





Tanga igitekerezo kuri iyi nkuru



Igitekerezo