U Bufaransa bwasoje iperereza bwakoraga ku ihanurwa ry’indege ya Habyarimana

Abacamanza bo mu gihugu cy’u Bufaransa basoje iperereza bakoraga ku ihanurwa ry’indege yari itwaye Habyarimana Juvenal wari Perezida w’u Rwanda. Iyi ndege yahanuwe kuwa 6 Mata 1994 binatuma Habyarimana ahita ahasiga ubuzima.
Nyuma yo kurangiza iperereza, ibiro by’ubushinjacyaha buzafata icyemezo cyo kureba niba bwajyana ikirego mu rukiko.

Abacamanza b’u Bufaransa bakomeje gushinja FPR kuba ari yo yahanuye indege ya Habyarimana, ku wa 06 Mata 1994 yari itwaye uwari umukuru w’igihugu, Juvénal Habyarimana.

Nyamara nubwo u Bufaransa bwakomeje gushinja FPR kuba ari yo yahanuye indege ya Habyarimana, ku wa Gatatu, tariki 9 Mutarama 2013 ikinyamakuru Libération cyo mu Bufaransa, , cyasohoye inkuru irimo ikimenyetso gishobora kugaragaza uruhare rwa Leta y’u Bufaransa ku ihanurwa ry’indege yari itwaye Habyarimana Juvenal wahoze ari Perezida w’u Rwanda.

Iki kinyamakuru kikaba cyaravuze ko ubwo umucamanza w’Umufaransa Marc Trévidic yakoraga icukumbura ku ihanurwa ry’iyo ndege, yavumbuye urupapuro rwemeza ko hari abasirikare b’abajandarume babiri, bakomoka mu gihugu cy’u Bufaransa, René Maier na Alain Didot, bapfiriye mu Rwanda muri Mata 1994 ariko ngo iby’urupfu rwabo bikaba bitarigeze bisobanuka.

Iyi nkuru yakomeje ivuga ko bishoboka ko bazize ko baba barumvise ibiganiro byabaye hagati ya Ambasade y’u Bufaransa i Kigali n’ingabo zari iz’u Rwanda, mbere y’uko indege yarimo Habyarimana ihanurwa, bityo Leta y’u Bufaransa ikaba yarifuzaga ko amakuru ajyanye n’iby’iyo ndege atazagaragazwa.

Iri perereza u Bufaransa burisoje butumvise Minisitiri w’ingabo w’u Rwanda, Gen James Kabarebe, wari watumweho ariko akanga kwitabira ubu butumire, aho abunganizi be mu mategeko bahamije ko nta mpamvu n’imwe yatuma uyu muyobozi yitaba umushinjacyaha w’Umufaransa, Jean-Marc Herbaut, wakoraga iri perereza ku ihanurwa ry’indege y’uwari Perezida w’u Rwanda, Juvenal Habyarimana.

Iyo ndege yari itwaye na Perezida wategekaga u Burundi Cyprien Ntaryamira.

U Rwanda rushinja u Bufaransa kugira uruhare muri Jenoside yakorewe Abatutsi muri Mata 1994.

Iri perereza ryateye amakimbirane n’umubano utameze neza hagati y’ibihugu byombi. Muri mwaka wa 2006, u Rwanda rwahagaritse umubano w’imigenderanire hagati yarwo n’igihugu cy’u Bufaransa.

Nyuma y’imyaka itatu nibwo umubano w’ibi bihugu wongeye kuzahurwa.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo
bigirimana rodrigue Kuya 26-12-2017

nibabafate abo bose bakwekwa kuriyo hanurwa ryiyondege