U Bufaransa: Twagira ukurikiranyweho Jenoside yirukanywe igitaraganya ku kazi yari yahawe

Nyuma y’impuruza yari yatanzwe na Komisiyo y’Igihugu yo kurwanya Jenoside (CNLG) yamagana ihabwa ry’akazi ku munyarwanda Dr. Charles Twagira kandi akurikiranyweho ibyaha bya Jenoside yakorewe Abatutsi muri Mata 1994, ibitaro byo mu Bufaransa byafashe icyemezo cyo kwirukana uyu mugabo igitaraganya ku kazi byari byahaye akazi.

Dr. Twagira yari yatangiye gukora muri ibi bitaro bya “Paul Doumer”, nyuma yo guhabwa akazi kandi yarigeze gufungwa n’ubutabera bw’u Bufaransa kubera ibyaha yari akurikiranyweho bya Jenoside.

Nubwo yaje gufungurwa ariko itegeko ryo mu Bufaransa rivuga ko umuntu ugifite idosiye mu butabera ku byaha atararyozwa, hari bumwe mu burenganzira aba atemerewe burimo guhabwa akazi cyangwa kugira ibindi bikorwa akora muri sosiyete.

Mu itangazo ibi bitaro byashyize ahagaragara, byavuze ko byamenye amakuru ko Twagira akurikiranyweho ibyaha bya Jenoside mu Rwanda nyuma y’icyumweru kimwe amaze guhabwa akazi.

Ibi bitaro bivuga kandi ko bikimara kumenya ayo makuru, byihutiye kubaza ubushinjacyaha bw’u Bufaransa kugira ngo bibone gufata umwanzuro w’ukuri.

CNLG yari yamaganiye kure iki gikorwa, ivuga ko Twagira akwiye gukatirwa n’inkiko cyangwa akoherezwa mu Rwanda kuhakorera igifungo yakatiwe n’urukiko rwa Gacaca rwa Bwishyura mu 2009.

PNG - 1022.3 kb
Dr. Twagira yirukanywe ku kazi igitaraganya nyuma yuko CNLG yamaganye akazi yahawe kandi akurikiranyweho kugira uruhare muri Jenoside yakorewe Abatutsi muri Mata 1994

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo