Turukiya yirengagije Amerika igura Misile z’u Burusiya

Turukiya yabonye ibice bya mbere by’ibisasu bya misile bihanura indege byo mu bwoko bwa S-400 biri mu byo yatumije mu Burusiya, nubwo Leta Zunze Ubumwe z’Amerika zari zayihanangirije kukubigura.

Minisiteri y’ingabo ya Turukiya itangaza ko uyu munsi ari bwo ibyo bisasu byageze ku kibuga cy’indege cya gisirikare kiri mu murwa mukuru Ankara.

Ibi biri burakaze Amerika, yari yaburiye Turukiya ko idashobora gutunga icyarimwe misile zo mu bwoko bwa S-400 ndetse n’indege z’intambara z’Amerika zo mu bwoko bwa F-35, ko igomba guhitamo kimwe.

Amerika isanzwe yaramaze guhagarika izo ndege yagomba kugurisha muri Turukiya ndetse ihagarika amahugurwa yo kuzitwara yari guha abapilote bo muri Turukiya, nkuko bivugwa n’umunyamakuru wa BBC Jonathan Marcus ukurikiranira hafi ibya gisirikare.

Uyu munyamakuru avuga ko Amerika ifite ubwoba ko Turukiya iramutse ikoresheje ubwo bwirinzi bwa misile bwa S-400 hamwe no kugira izo ndege z’intambara z’Amerika, Abarusiya bashobora kubona amakuru y’ingenzi y’ibiranga izo ndege, bityo Uburusiya bukaba bwanamenya uburyo bwiza bwo kuzitsinda.

Turukiya n’Amerika bihuriye mu muryango w’ubwirinzi mu bya gisirikare w’ibihugu by’i Burayi n’Amerika wa OTAN, ariko Turukiya imaze igihe inatsura umubano wa hafi n’Uburusiya.

Ubwirinzi bwa misile S-400 ni bwoko ki?

Ni bumwe mu bwirinzi bwo guhanura indege bukataje cyane kurusha ubundi ku isi.

Uburusiya buvuga ko ubwirinzi bumwe bwa misile buzwi nka S-400 bushobora guhanura indege 80 icyarimwe.

Amakuru avuga ko bushobora guhanura indege iri mu ntera igera kuri kilometero 400 uvuye ku butaka.


Ubwirinzi bwa misile buhanura indege bwa S-400 ni bumwe mu bukataje cyane ku isi

@Umubavu.com





Tanga igitekerezo kuri iyi nkuru



Igitekerezo