Turukiya: Indege yataye inzira abagenzi batangira gukurikiranya amasengesho

Nyuma yuko indege itwara abagenzi mu gihugu cya Turukiya itaye ikibuga ikajya kugwa ku nkombe y’umusozi hafi y’ikiyaga, abagenzi ubwoba bwari bwose batangira kuvuga amasengesho menshi batakambira Imana ngo ibarokore.

Indege ya Boeing 737-800 y’ishyirahamwe Pegasus Airlines yari itwaye abagenzi 168 barimo n’abakozi bo mu ndege yagurutse iva Ankara, igwa Trabzon ku nkengero y’ikiyaga cyirabura (Mer Noire) ku mugoroba wo ku munsi wa gatandatu.

Kugeza ubu ntiharamenyekana icyaba cyarateye iyi ndege guta inzira yayo. Abari muri iyo ndege batabawe basohorwa nkuko bulamatari Yucel yavuze.

Icyakora ku bw’amahirwe Imana yakinze akaboko kuko nta muntu n’umwe yakomerekeye muri iyo ndege.

Ubutegetsi bwa Turukiya bwahise butangira iperereza mu ntumbero yo kumenya icyaba cyarateye iyo mpanuka.

Ikinyamakuru cya leta Anadolu kivuga ko abagenzi bari muri iyo ndege batewe n’ubwoba nyuma yaho Abapilote bananiwe kuyobora iyi ndege mu nzira yayo nyirizina.

PNG - 727.3 kb
Ifoto yerekana iyo ndege iryamye aho yataye inzira yayo


Umwe mu bagenzi witwa Fatma Gordu waganiriye n’abanyamakuru ba BBC yagize ati "Twahengamiye ku ruhande. Igice cy’imbere cy’indege cyari cyubamye mu gihe icy’inyuma cyari kikiri mu mu nzira yayo. Abantu benshi bagize ubwoba abandi batera induru".

Iperereza kuri iyi mpanuka riracyakomeje byanatumye iki kibuga cy’indege cya Turukiya gifungwa mu gihe cy’amasaha atari make.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo
H. Alex Kuya 1-02-2018

Imna niyoyabarinze

akazuba alisa Kuya 15-01-2018

Imana is him we yahabaye turayishimye