Trump yijeje ko 2020 irangira urukingo rwa Covid-19 rubonetse

Mu gihe kugeza ubu nta muti cyangwa urukingo by’icyorezo cya COVID-19 biremezwa n’inzego z’ubuzima zikomeye ku isi nka OMS uretse Madagascar yavuze ko yavumbuye umuti w’iki cyorezo bigateza impaka, Perezida wa Leta Zunze Ubumwe za Amerika, Donald Trump avuga ko yizeye neza ko igihugu cye kizaba gifite urukingo rwa Coronavirus mbere ya 2021.

Ibi Perezida Trump yabitangarije mu kiganiro na Fox News aho yagize ati "Twizeye neza ko tuzaba dufite urukingo mu mpera z’umwaka".

Abashakashatsi batandukanye ku isi barahiganirwa kugera kuri urwo rukingo, ariko benshi muri bo bavuga ko mu mwaka utaha aribwo rushobora kuba rwabonetse, rushobora kugezwa kuri benshi.

Bitandukanye n’ibyo abajyanama be bwite mu buvuzi bavuga ku gihe uru rukingo ruzabonekera, Bwana Trump we biboneka ko abangutsa icyo gihe.

Yagize ati: "Abaganga bashobora kuvuga bati ’sinari nkwiye kubivuga gutyo’. Ariko ko njye mvuga icyo ntekereza".

Bishoboka ko urwo rukingo rwaboneka vuba?

Mu isesengura ry’umunyamakuru wa BBC wibanda kuri siyansi n’ubuvuzi, James Gallagher, avuga ko hashize ukwezi kurenga abahanga bagerageje urukingo rwa mbere ku bantu mu mujyi wa Seattle muri Amerika.

Gusa haracyari byinshi byo gukora nubwo iryo gerageza rya mbere ryagenze neza.

Urwo rukingo rugomba kubanza kugeragezwa kenshi, kwemezwa n’abagenzuzi mu by’ubuvuzi no gushyiraho uburyo bwo gukora ingano yarwo ikenewe.

Kugira ngo zigerweho, inkingo ubusanzwe zifata imyaka, rimwe na rimwe irenga 10.

Inzobere nyinshi zivuga ko urukingo rwa Covid-19 rushobora kuboneka hagati mu mwaka wa 2021, hazaba hashize amezi ari hagati ya 12 na 18 iyi virusi igaragaye.

Ibyo nabyo byaba ari intsinzi ikomeye kuri siyansi, nubwo bitizewe na none ko urwo rukingo ruzaba rukora neza.

Coronavirus zigera kuri enye zisanzwe ziri mu bantu. Zitera ibimenyetso nk’iby’ibicurane bisanzwe kandi kugeza ubu nta n’imwe muri zo irabonerwa urukingo.

Iyi Coronavirus tuvuga ikomeje kuyogoza isi, ubu tuvugana imaze kwandura abantu bagera kuri 3,567,561, imaze kwica 248,333 mu gihe abayikize bagera kuri 1,157,275 kandi imibare iriyongera umunota ku wundi.

Leta Zunze Ubumwe za Amerika ni zo zisumbirijwe cyane na COVID-19 kuko ubu tuvugana abagera kuri 1,188,421 bamaze kwemezwa ko banduye iki cyorezo, abagera ku 68,602 bamaze guhitamwa na cyo.

Ku mugabane wacu wa Afurika igihugu gisumbirijwe cyane ni Afurika y’Epfo ifite abagera ku 6,783 bamaze kucyandura mu gihe kimaze kwicayo abagera ku 131. Ikurikirwa na Misiri ifite abanduye 6,465 mu gihe abo yishe ari 429.


Trump ari mu kiganiro yavugiyemo ko abona urukingo ruzaboneka muri uyu mwaka





Tanga igitekerezo kuri iyi nkuru



Igitekerezo