Trump yasubukuye kwiyamamaza yongera gukerensa COVID-19

Perezida Donald Trump wa Leta Zunze Ubumwe z’Amerika yongeye gusubira mu kwiyamamaza, nta byumweru bibiri birashira bamusanzemo icyorezo cya Coronavirus.

Abantu babarirwa mu bihumbi bateraniye mu gikorwa cyo kwiyamamaza cyabereye hanze mu mujyi wa Sanford muri leta ya Florida.

Bwana Trump, wahinyuje bamwe bavugaga ko adakwiye kwiyamamaza muri iki gihe, yakoze icyo gikorwa kiri muri bine ateganya gukora mu minsi ine iri imbere muri za leta ziba ari isibaniro mu gihe cy’amatora.

Perezida Trump na mukeba we Joe Biden barimo guhatanira amajwi, muri iki gihe habura ibyumweru bitatu ngo amatora ya Perezida abe ku itariki ya 3 y’ukwezi kwa 11.

Ejo ku wa Mbere, Bwana Biden yiyamamarije muri leta ya Ohio, indi leta na yo iba idafite ishyaka runaka rizwi ikunze gutora (Swing State).

Amakusanyabitekerezo yo mu gihugu agaragaza ko Bwana Biden arusha amanota 10 Bwana Trump yo kuba yatorwa.

Ariko muri za leta zimwe na zimwe, ayo manota aragabanuka nko muri leta ya Florida, aho arusha Trump amanota 3,7, nkuko muri rusange bigaragazwa n’amakusanyabitekerezo y’ikigo Real Clear Politics.

Izo leta z’isibaniro nka leta ya Florida, ziba ari ingenzi mu kubona ubwiganze rusange bw’amajwi 270 acyenerwa mu gutsindira kuba Perezida w’Amerika, bitagenwa no kubara gusa mu buryo busanzwe umubare w’amajwi y’abatoye.


Umuganga bwite wa Perezida Trump avuga ko nta byago agifite byo kwanduza abandi Covid-19

Bwana Trump bamusanzemo Covid-19 mu minsi 11 ishize, ajyanwa mu bitaro bya Walter Reed National Military Medical Center ku munsi wakurikiyeho.

Ariko ku Cyumweru, muganga we bwite yavuze ko nta byago agifite byo kwanduza abandi Covid-19.

Ejo ku wa Mbere, uwo muganga yahishuye ko ibizamini bya vuba aha cyane amaze gukorerwa byagaragaje mu minsi ikurikiranye ko nta Covid-19 afite, nubwo uwo muganga atatanze amatariki ibyo bizamini byafashweho.

Trump yavuze iki muri leta ya Florida?

Bwana Trump yakomeje kwibasira Bwana Biden nk’ibisanzwe.

Yavuze ko isoko ry’imari n’imigabane rihagaze neza ndetse avuga ku kigo cy’ubwirinzi bwo mu isanzure, nka bimwe mu byo yagezeho ku butegetsi bwe.

Mbere y’imbaga y’abantu benshi muri bo batambaye agapfukamunwa, yagaragaje gushidikanya ku buzima bwo mu mutwe bwa Bwana Biden.

Avuga ku gukira Covid-19 kwe, hari aho yavuze ati "Bavuga ko mfite ubudahangarwa ndumva nkomeye cyane. Ndibuze kugenda n’amaguru aho ngaho nsome buri muntu wese".

"Ndasoma abagabo n’abagore beza, ndabaha ’bisou’ nini ibyibushye".

Ntabwo bitangaje kuba iyi leta ya Florida ari yo Bwana Trump yahise ahitiramo ubwo yari asubukuye kwiyamamaza kwe.

Arashaka kandi acyeneye kuyitsindira mu matora. Yayitsindiye hamana mu matora yo mu 2016.

Ni na leta irimo urundi rugo rwe guhera mu kwezi kwa Cyenda mu mwaka wa 2019, nubwo ubuzima bwe bwose yabaye i New York.


Perezida Trump yajugunyiye udupfukamunwa imbaga y’abamukurikiye bacye muri bo ni bo bari bambaye agapfukamunwa

Kwiyamamaza kwe i Florida nta kimenyetso kwagaragaje ko Bwana Trump hari icyo yahindutseho mu kwirinda kubera uburwayi yagize.

Kandi byitezwe ko no mu bindi bikorwa byo kwiyamamaza muri iki Cyumweru muri Pennsylvania, Iowa na North Carolina, nta kizahinduka ngo yigengesere yirinda Coronavirus.

Abamunenga bavuga ko adashishikariza abantu kwambara agapfukamunwa cyangwa gukurikiza ingamba zo guhana intera hagati y’umuntu n’undi.

Hagati aho, Bwana Biden yanenze imyitwarire ya Bwana Trump, avuga ko "Perezida Trump aje i Sanford uyu munsi [ku wa Mbere] nta kindi azanye kitari imyitwarire itarimo kwirinda, imvugo y’amacakubiri, no kubiba ubwoba".

Bwana Biden we mu kwiyamamaza kwe ejo ku wa Mbere yakoresheje uburyo burimo kwigengesera kurushaho, ahagarara ahantu habiri muri leta ya Ohio.

Biteganyijwe ko Biden na we aza kuba ari i Florida kuri uyu wa Kabiri.

Abayeho mu buzima busharira nyuma yo gukora impanuka igufwa bakarikuramo ubu akaba ategereje kurisubizwamo:





Tanga igitekerezo kuri iyi nkuru



Igitekerezo