Trump ngo afite ibihamya ko COVID-19 yakorewe mu Bushinwa, ntahuza n’ubutasi bwe

Mu gihe Ishami ry’Umuryango w’Abibumbye ryita ku buzima, OMS riheruka gutangaza ko icyorezo cya COVID-19 giterwa na virusi ya Corona kitakorewe mu nzu zikorerwamo ubushakashatsi (Laboratoire), ibi Perezida wa Amerika, Donald Trump ntabikozwa ahubwo akomeje kugaragaza kudahuza n’ubutasi bw’igihugu cye ku nkomoko y’iki cyorezo we akomeza gushinja u Bushinwa.

Trump yagaragaje ko adahuza n’inzego z’ubutasi za Leta ye ubwo yavugaga ko yabonye ibihamya ko Coronavirus yakorewe muri Laboratoire mu Bushinwa.

Mbere, uyobora ibiro by’ubutasi bya Amerika yari yatangaje ko bakiri gukora iperereza ku nkomoko y’iyi virus.

Gusa ibi biro bivuga ko byamaze kubona ko Covid-19 "atari virus yakozwe n’abantu cyangwa yahinduwe nkana".

U Bushinwa bwahakanye kenshi ibivugwa ko iyi virus yaba yarakowe muri laboratoire.

Kuva iyi virus yaboneka bwa mbere i Wuhan mu Bushinwa mu mpera z’umwaka ushize, abantu bagera kuri miliyoni 3,2 ku isi bamaze kuyandura, naho abarenga 230,000 yarabishe.

Ku mugoroba ejo kuwa kane, Bwana Trump yabajijwe n’umunyamakuru niba "hari ibihamya bikomeye yari yabona ko Wuhan Institute of Virology ariho iyi virus yaba yarakomotse".

Perezida Trump yavuze iki?

Adatanze amakuru arambuye, yasubije ati "Yego, ndabifite. Yego, ndabifite".

Ati "Kandi ndatekereza ko OMS/WHO ikwiye guterwa isoni no kuba imeze nk’ishinzwe kuvuganira u Bushinwa".

Abajijwe gusobanura neza ibyo avuga, yagize ati "Ntabwo nabibwira. Ntabwo nemerewe kubibabwira".

Bwana Trump yavuze ko atazi neza niba Ubushinwa bwarayikoze habayeho kwibeshya cyangwa bigambiriwe, avuga ko icyo bwongeyeho ari ugukora irindi kosa.

Ati "Sinumva uburyo abantu batemererwaga kugenda imbere mu Bushinwa ariko bakemererwa kujya ahandi ku isi. Ni ibintu bibi, ni ikibazo gukomeye bagomba gusubiza".

Ejo ku wa Kane, ikinyamakuru New York Times cyavuze ko umwe mu bategetsi bakuru muri White House yasabye ibiro bishinzwe ubutasi guperereza niba iyi virus yaravuye muri laboratoire y’i Wuhan.

Ibyo biro kandi byasabwe guperereza niba u Bushinwa na OMS byari bifite amakuru kuri iyi virus mbere nk’uko umwe mu bategetsi ba Amerika utatangajwe yabibwiye NBC News.


Perezida Trump mu kiganiro n’abanyamakuru kuri uyu wa Kane tariki ya 30 Mata 2020





Tanga igitekerezo kuri iyi nkuru



Igitekerezo