Trump na Biden mu mahina ya nyuma yo kwiyamamaza

Umukandida w’ishyaka ry’abademokarate Joe Biden arimo kwiyamamaza muri leta ya Michigan mu gihe Perezida Donald Trump arimo kwiyamamariza muri leta ya Pennsylvania - leta zombi zishobora kuba ingenzi mu gutsinda amatora yo ku wa kabiri.

Bwana Biden, washyigikiwe mu kwiyamamaza kwe na Barack Obama wahoze ari Perezida, yavuze ko Amerika "irambiwe akajagari" k’ubutegetsi bwa Trump.

Bwana Trump yavuze ko hazabaho "intsinzi ikomeye" y’abarepubulikani.

Mu makusanyabitekerezo, Bwana Biden aza imbere mu kugira amahirwe menshi yo gutsinda amatora, ariko ayo mahirwe agabanukaho muri leta nk’izo zidasanzwe zifite uruhande ruzwi zikunze gutora, zishobora kugena ibiva mu matora.

Abantu barenga miliyoni 85 bamaze gutora mbere y’itariki nyirizina muri aya matora y’Amerika, miliyoni 55 muri bo batoye bifashishije iposita mu kwirinda icyorezo cya coronavirus.

Ibi biraca amarenga ko aya matora ashobora kuba aya mbere yitabiriwe cyane mu myaka irenga 100 ishize.

Bwana Biden na Bwana Obama biyamamarije mu mujyi wa Flint muri Michigan aho abantu bitabiriye batavuye mu modoka zabo, mbere yuko abo bombi bajya mu mujyi wa Detroit aho baje gushyigikirwa n’umuririmbyi Stevie Wonder.

Bwana Trump yatsinze muri Michigan bimugoye mu matora yo mu 2016.


Muri uko kwiyamamaza, Stevie Wonder yahinduye amagambo yo mu ndirimbo ye ’Superstition’ ashimagiza Joe Biden na Kamala Harris biyamamazanya ngo azamubere visi perezida natsinda amatora

Muri iki gikorwa cya mbere cyo kwiyamamaza ari kumwe n’uyu wahoze ari visi perezida we, Bwana Obama yavuze ko imyitwarire ya Bwana Biden ari myiza kurusha iya Bwana Trump.

Ati: "Byahozeho ko kuba umugabo bivuze kwita ku bandi bantu... atari ugushaka kubishimirwa ahubwo ari ukugerageza kubaho mu buryo bukwiye".

"Nimutora Joe, ibyo ni byo muzabona birimo kuva muri White House".

Ubwo yari ageze ku rubuga rwo kwiyamamaza, Bwana Biden yibasiye mukeba we Bwana Trump, avuga ko igihe kigeze ngo "azinge utwe ajye mu rugo".

Bwana Biden yongeyeho ati: "Turambiwe akajagari, ubutumwa bwo kuri Twitter, uburakari, kunanirwa akazi, kwanga kwirengera ingaruka izo ari zo zose".

Ibikorwa byo kwiyamamaza bya Bwana Biden muri rusange byitabirwa n’abantu bacye, kandi uyu mukandida agakurikiza bikomeye uburyo bwo guhana intera mu kwirinda coronavirus.

Si ko bimeze kuri Bwana Trump, ku wa gatandatu wakoze ibikorwa byo kwiyamamaza bine muri leta ya Pennsylvania.

Aha mbere, mu mujyi wa Newtown, yageze ku rubuga aririmbirwa ngo "Indi myaka ine!", abwira abo muri iyi leta yatangiriyemo ibikorwa byo gushaka ubwigenge bw’Amerika mu myaka amagana ishize ko "mu minsi itatu uhereye ubu iyi leta izarokora ihame ry’amahirwe angana ku Banyamerika".

Yanateye urwenya kuri Covid-19 aherutse kurwara n’umugore we Melania Trump na we akayandura.

Ati: "Nibura ibihuha byuko tutabana byagaragaye ko ari ibinyoma".


Bwana Trump yavuze ko leta ya Pennsylvania "izarokora ihame ry’amahirwe angana ku Banyamerika"

Nyuma y’iyo mitingi yitabiriwe n’abantu babarirwa mu magana menshi - muri rusange bacye ugereranyije n’uko bisanzwe kuri we - Perezida Trump yerekeje mu mujyi wa Reading aho yakiriwe n’abamushyigikiye babarirwa mu bihumbi aho indege ye yashyikiye.

Bwana Trump ateganya gukora izindi mitingi 10 mu minsi ibiri ya nyuma yo kwiyamamaza.

Itsinda rishinzwe ibikorwa byo kumwamamaza rivuga ko hateganyijwe ibikorwa bitanu byo kwiyamamaza muri leta ya Michigan, Iowa, North Carolina, Georgia na Florida kuri iki cyumweru.

Ndetse n’ibindi bikorwa bitanu byo kwiyamamaza muri North Carolina, Pennsylvania, Wisconsin na Michigan, bucya amatora aba.


Bwana Obama (ibumoso) yavuze ko Bwana Biden azita ku Banyamerika

Ku munsi wo gutanga igihembo cyamwitiriwe, Ingabire Victoire Umuhoza yibukije abanyarwanda ko bafite intwaro anavuga impinduka zikenewe mu gihugu:





Tanga igitekerezo kuri iyi nkuru



Igitekerezo