Trump aracyatsimbaraye ku muti wa COVID-19 wanzwe

Perezida wa Leta Zunze Ubumwe z’Amerika, Donald Trump yongeye kurwanirira ikoreshwa ry’umuti wa Hydroxychloroquine mu kurwanya Coronavirus, avuguruza impuguke mu bijyanye n’ubuvuzi zo muri iki gihugu.

Yavuze ko uwo muti uvura Malaria wanzwe nk’umuti wa Covid-19 kubera ko gusa ari we wavuze ko wakoreshwa.

Bwana Trump avuze ibi nyuma yuko urubuga rwa Twitter rwirukannye umuhungu we mukuru kuri urwo rubuga mu gihe cy’amasaha kubera gutangaza ubutumwa bwogagiza akamaro ka Hydroxychloroquine.

Nta gihamya ihari yuko uwo muti ushobora kuvura iyi virusi, kandi abagenzuzi b’imiti baburira ko ushobora guteza ibibazo by’umutima.

Mu kwezi gushize kwa Gatandatu, ikigo cy’Amerika kigenzura ubuziranenge bw’imiti n’ibiribwa (FDA) cyihanangirije ikoresha ry’uwo muti mu kuvura Coronavirus.

Hari nyuma y’amakuru yuko uteza "ibibazo bikomeye mu gutera k’umutima" ndetse n’ibindi bibazo by’ubuzima.

Ikigo FDA cyanawambuye uruhushya rwo gukoreshwa mu buryo bw’amaburakindi mu kuvura Covid-19.

Ishami ry’Umuryango w’Abibumbye ryita ku buzima (OMS/WHO) rivuga ko "ubu nta gihamya" ihari yuko uwo muti ari ingirakamaro mu kuvura cyangwa kurinda Covid-19.

Mu yandi makuru:

- Abishwe na Coronavirus muri Amerika baraye bageze ku kigero cyo hejuru cyane mu mezi yari ashize, abagera hafi ku 1,600 ni bo bapfuye mu masaha 24 ashize.

- Kompanyi Moderna yo muri Amerika ikora imiti yavuze ko urukingo rwayo rwa Coronavirus rwageragejwe rwabatuye ubwirinzi bukomeye bw’umubiri, mu bushakashatsi bwakorewe ku nguge. Moderna yavuze ko urwo rukingo rwarinze kwandura kw’ibihaha ndetse rukingira indwara y’ibihaha.

- Kompanyi ya Kodak izwi cyane mu gukora za ’cameras’, yagiye mu gukora imiti ndetse leta y’Amerika yayihaye inguzanyo ya miliyoni 765 z’amadolari. Iyi kompanyi yahoze ari igihangange mu gukora za ’cameras’, igiye kujya ikora iby’ibanze bikoreshwa mu miti ifasha kurwanya Coronavirus.

Mu kwezi kwa Gatatu nibwo umuti wa Hydroxychloroquine wogagijwe bwa mbere na Bwana Trump w’imyaka 74, avuga ko wavura Covid-19.

Amezi abiri nyuma yaho, yatunguye abanyamakuru avuga yari amaze igihe afata imiti itaremezwa, mu kwirinda iyo virusi.

Trump yavuze iki nyirizina?

Ku munsi w’ejo ku wa Kabiri, Perezida Trump yabwiye abanyamakuru mu biro bye White House ati "Navuga gusa ko mpereye k’uko mbibona, ndetse nshingiye ku byo nasomye byinshi no ku bumenyi bwinshi kuri wo, ntekereza ko [umuti wa Hydroxychloroquine] ushobora gutanga umusaruro mwiza cyane mu bihe bya mbere [by’uburwayi bwa Covid-19]".

"Sintekereza ko hari icyo uhomba na kimwe mu kubikora [mu kuwufata], atari uko gusa muri politike bigaragara ko udakunzwe cyane".

Yongeyeho ati "Iyo ntanze inama ku kintu, bakunze kuvuga ngo ’mwigikoresha’".

Perezida Trump n’umuhungu we Donald Trump Jr ni bamwe mu bakoresha imbuga nkoranyambaga batangaje ubutumwa bwa videwo mu ijoro ryo ku wa mbere.

Iyo Videwo igaragaza itsinda ryitwa ’America’s Frontline Doctors’, cyangwa abaganga bo muri Amerika bari ku rugamba rwa Coronavirus, ugenekereje mu Kinyarwanda.

Abo baganga bagaragara bashishikariza abantu gukoresha Hydroxychloroquine nk’umuti wo kuvura Covid-19.

Imbuga za Facebook na Twitter zakuyeho ubwo butumwa, zibushyiraho n’ikimenyetso cyuko bugamije kuyobya.

Ariko izi mbuga zabikoze abarenga miliyoni 17 bamaze kubona bumwe mu butumwa bw’iyo Videwo.

Twitter yanabujije uwo muhungu mukuru wa Perezida kugira icyo atangaza kuri urwo rubuga mu gihe cy’amasaha 12, nk’igihano cyuko yatangaje iyo Videwo.

Karasira ati "Ndi mu gihirahiro nabuze icyo mvuga, barashaka kunyirukana":





Tanga igitekerezo kuri iyi nkuru



Igitekerezo