Tanzaniya: Umugabo yaciye imitwe abana be b’impanga ahita aburirwa irengero

Umugabo witwa Respicius Diocress wo mu gihugu cya Tanzaniya mu gace ka Butayaibega gaherereye mu karere ka Bukoba mu ntara ya Kagera, yishe abana be b’impanga b’imyaka 4 abaciye imitwe akoresheje umupanga, asiga ahaye mukuru wabo witwa Japhet Respicius w’imyaka itanu Bibilia ngo asigare abasengera maze ahita atoroka.

Igipolisi gikorera mu karere kabereyemo iri bara gifatanyije n’abaturage gikomeje gushakisha uruhindu uyu mugabo wihekuye mu joro ryo ku Cyumweru tariki ya 15 Mata 2018, dore ko nyuma yo kwica aba bana yanagarutse agatwika inzu babagamo ndetse akanatemagura insina yari yateye hafi y’inzu.

PNG - 1.1 Mb
Uretse aya mahano uyu mugabo yakoze, yaranagarutse rwihishwa atwika n’inzu babagamo


Global Publishers dukesha iyi nkuru banditse ko Polisi yatangaje ko nyuma y’uko uyu mugabo akora iri bara, we ubwe yihamagariye Polisi ayimenyesha ibyo amaze gukora maze nayo ikihutira gutabara, amakuru yanemejwe na bamwe mu baturanyi b’uyu muryango.

PNG - 973.4 kb
Uyu muturanyi niwe wahamagaye Polisi nyuma yo gutahura iri bara


Umukuru w’igipolisi cyo mu gace ka Butayaibega, Geofrey Deogratias yatangaje ko ubu bwicanyi bwabaye mu masaha ya saa saba z’igicuku ku Cyumweru tariki ya 15 Mata 2018, aho uyu mugabo yafashe abana be b’impanga bombi akabaca imitwe akoresheje umupanga agahita atoroka.

Geofrey Deogratias yagize ati “ubwo twageraga mu rugo rw’uyu mugabo twasanze koko aba bana bishwe baciwe imitwe ndetse mukuru wabo abicaye imbere afite bibiriya mu ntoki arimo kurira cyane”.

PNG - 1.1 Mb
Uyu ni mukuru w’izi mpanga wasanzwe arira cyane
PNG - 890.4 kb
Uretse uyu mukuru w’aba bana wariraga, n’abaturanyi b’uyu muryango bari mu kiriyo


Amakuru aravuga ko nyina w’aba bana yari yaratandukanye n’uyu mugabo ndetse ko umunsi yabiciyeho bari bavuye kumusura aho atuye mu kandi gace.

PNG - 1.2 Mb
Ku munsi w’ejo hashize ku wa kabiri tariki ya 17 Mata 2018, nibwo aba bana bari impanga (Devotha Nyangoma Respicius na Johanes Kato Respicius) bashyinguwe muri izi mva zigaragara


Abaturanyi b’uyu mugabo wihekuye bavuze ko nyuma yo gushyingura izi mpanga, ngo uyu mugabo yongeye kugaruka mu rugo rwe atwika inzu ndetse anatemagura insina zari munsi y’urugo arongera aratoroka ndetse ngo akaba yaranandikiye umuyobozi wo mu gace atuyemo ko azatuza yishe abo mu muryango we bose.

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo