Tanzania yongereye ikandamiza mbere y’amatora-HRW

Umuryango uharanira uburenganzira bwa muntu, Human Rights Watch (HRW), uvuga ko abategetsi ba Tanzania bongereye ibikorwa byo gukandamiza amashyaka atavuga rumwe na leta ndetse n’imiryango itegamiye kuri leta, mbere y’amatora yo mu kwezi gutaha.

HRW yananenze amategeko mashya akumira ibitangazamakuru akabibuza gutangaza amakuru ku ngingo zikomeye za politike, harimo no ku cyorezo cya Coronavirus.

Uyu muryango mpuzamahanga uharanira uburenganzira bwa muntu uvuga ko guhera hagati mu kwezi kwa Gatandatu, abantu batari munsi ya 17 b’abayoboke b’amashyaka atavuga rumwe na leta n’abayinenga batawe muri yombi.

Mu bihe byashize, leta ya Tanzania yagiye ihakana ibyo ishinjwa byo kwibasira abatavuga rumwe nayo no kuniga itangazamakuru ryigenga.

HRW ivuga ko atari ibintu byapfuye kuba gutyo gusa mu buryo bw’uruhurirane kuba leta ya Tanzania yarongereye ibikorwa by’ikandamiza no kuba amatora yo mu kwezi gutaha kwa cumi yegereje.

HRW ivuga ko imiryango imwe yagiye ijya kuba indorerezi mu matora yabanje, ubu noneho akanama k’amatora kayibujije kujya kuba indorerezi.

Mu cyumweru gishize, igitangazamakuru Clouds TV kitegamiye kuri leta cyahagaritswe by’agateganyo. Hari nyuma yuko gitangaje imibare ijyanye n’amatora yimirije itari yemejwe n’akanama k’amatora.

Perezida John Magufuli, wageze ku butegetsi mu mwaka wa 2015, arimo guhatanira manda ya Kabiri y’imyaka itanu.

Si benshi mu bakurikiranira hafi politike ya Tanzania biteze ko aya matora azaba mu mucyo no mu bwisanzure.


Perezida John Magufuli arimo guhatanira manda ya Kabiri y’imyaka itanu

Byakaze noneho Amerika yinjiye mu kibazo cya Rusesabagina, umukobwa wa Rusesabagina arabivuze byose:





Tanga igitekerezo kuri iyi nkuru



Igitekerezo