Tanzania iri gusuzuma yitonze raporo ziyishinja kuniga itangazamakuru

Leta ya Tanzania ivuga ko iri kwiga yitonze raporo z’imiryango ya Human Rights Watch na Amnesty International zivuga ko ubutegetsi buriho ubu bubangamiye bikomeye ubwisanzure bw’itangazamakuru no kuvuga icyo utekereza muri iki gihugu.

Iyi miryango ivuga ko amategeko yatowe mu 2015 Perezida John Magufuli ageze ku butegetsi, abangamiye ubwisanzure bwo gutara no gutangaza amakuru, imiryango itegamiye kuri leta n’abatavuga rumwe n’ubutegetsi.

Augustine Mahiga, Minisitiri w’Ubutabera wa Tanzania, yabwiye itangazamakuru ko Guverinoma izasubiza umurongo ku wundi ibiregwa ubutegetsi muri izi raporo.

Yavuze ko izi raporo, zasohotse ku wa mbere, ziri kwigwaho byimbitse mu bwitonzi bushoboka, ngo nubwo bimwe mu byo zivuga byagarutsweho mu gihe cyashize.

Iyi miryango iharanira uburenganzira bwa muntu isaba Perezida Magufuli kuvanaho amategeko abangamiye ubwisanzure no kureka ibirego ku banyamakuru n’abatavuga rumwe n’ubutegetsi.

Kuva mu 2015, Tanzania yaramanutse ku rutonde rw’ubwisanzure bw’itangazamakuru rw’icyegeranyo cya World Press Freedom Index, ubu iri ku mwanya wa 118 mu bihugu 180.

Ernest Sagaga, umunyamabanga mukuru wungirije wa International Federation of Journalists, yabwiye itangazamakuru ko Tanzania yahoze ari intangarugero mu karere mu bwisanzure bw’itangazamakuru.

Ati "Ariko muri iyi myaka ya vuba twabonye ibintu bigenda bihinduka, abanyamakuru n’ibinyamakuru bikurikiranwa ku mpamvu bivugwa ko zishingiye ku mwuga wabo".

Guverinoma ya Tanzania yakomeje guhakana ibyo ishinjwa byo kubangamira ubwisanzure bw’intagazamakuru no guhohotera no kwima umwanya abatavuga rumwe n’ubutegetsi.

Imiryango iharanira uburenganzira bwa muntu ivuga ko muri iyi myaka Tanzania ibangamiye itangazamakuru ryigenga





Tanga igitekerezo kuri iyi nkuru



Igitekerezo