Tanzania: Inkingo si nziza, tureke kuzirukira, dukomeze gusenga Imana- John Pombe Magufuli

Perezida wa Repubulika ya Tanzania Dr. John Pombe Magufuli yatangaje ko nta nkingo za Covid-19 igihugu cye gikeneye kuko atari nziza ndetse nta n’impamvu yo kuzirukira nyuma y’uko muri iki gihugu hagaragaye abanduye ubundi bwoko bushya bwa virusi ya Corona bavuye kwiteza inkingo hanze ya Tanzania.

Kuva mu kwezi kwa gatandatu k’umwaka ushize ni bwo perezida Magufuli yongeye kwemera ko mu gihugu ayobora hari abantu bagaragaweho ubundi bwoko bwa virusi ya Corona nyuma yo kujya mu mahanga kwiteza urukingo bakagaruka banduye.

Mu mwaka ushize Perezida Magufuli yavuze ko igihugu cye kitarimo Virusi ya Corona kandi ahamya ko amasengesho ari yo yabafashije gutsinda icyo cyorezo.

BBC dukesha iyi nkuru yanditse ko Perezida magufuli yabujije abashinzwe ubuzima muri Tanzania kutihutira kuzana inkingo mu gihugu cye batabatse kwerekana ubuziranenge bwazo kuko zishobora kugira ingaruka mbi ku buzima bw’abaturage.

Yagize ati: “Minisitiri w’Ubuzima agomba kwitonda, bashobora kwirukira izo nkingo hadakozwe ubushakashatsi; inkingo zose si nziza kuri twebwe tugomba kuzitondera. Inkingo si nziza. Iyo umuzungu aba ashobora gukora inkingo yari gukora urwa SIDA, Cancer n’Igituntu.”

Ubwo yari mu muhango wo gutera ibiti mu ishyamba ryo mu Karere ka Chato mu Ntara ya Geita, Perezida Magufuli yagize icyo avuga ku ndwara ya Covid-19 maze asaba abaturage gukomeza amasengesho no kurya indyo yuzuye kandi bagahaga.

Ati: “Dukomeze kwitonda hamwe no gusenga, mu gihe dukomeza imirimo yacu isanzwe ya buri munsi, murye neza muhage Corona inanirwe kwinjira mu mibiri yanyu.”

Ku byerekeye ubundi bwoko bwa Virusi ya Corona, Perezida Magufuli yavuze ko hari Abatanzania bajya kwikingiza hanze y’igihugu bakagaruka bazanye ubundi bwoko bw’iyi virusi.

Yagize ati: “Nzi ko hari Abatanzania bamwe na bamwe bavuye mu gihugu bajya hanze gukingirwa baza bazanye ubundi bwoko bwa Corona. Tureke kwirukira inkingo kuko si buri rukingo rutugirira umumaro. Ni ngombwa ko Abatanzania tuba maso, tukirinda, tuzageragezwa ariko dukomeze gusenga kandi twigengesera.”

Perezida Magufuli yatangaje ibi mu gihe Kiliziya Gatulika muri kiriya gihugu isohoye itangazo rivuga ko imibare y’abandura n’abahitanwa na virusi ya Corona igenda yiyongera ku Isi, bityo ihamagarira abantu bose gukurikiza ingingo zose zijyanye no gukingirwa.

PNG - 339.3 kb
Perezida Magufuli yabujije Abatanzania kwirukira inkingo za Covid-19

PEREZIDA YIRUKANYE UMUGABA MUKURU W’INGABO N’ABAMWUNGIRIJE ||YISHWE N’UBURYOHE BWO GUTERA AKABARIRO





Tanga igitekerezo kuri iyi nkuru



Igitekerezo