Tanzania: Hategerejwe umwanzuro w’urukiko ku gihano cy’urupfu cyabaye amateka henshi

Mu gihe mu bihugu byinshi ku isi birimo n’u Rwanda igihano cy’urupfu cyavanyweho, mu mategeko ya Tanzania haracyarimo ko uhamwe n’ubugambanyi no kwica bihanishwa igihano cy’urupfu.

Urubanza rwo guvanaho iki gihano muri Tanzania rwashinzwe na ’Tanzania Legal and Human Rights Centre’ imaze igihe yamagana iki gihano.

Mu bihugu 195 bigize Umuryango w’Abibumbye, 55 muri byo biracyatanga igihano cy’urupfu, muri ibi harimo Leta zZnze Ubumwe za Amerika, Botswana, Misiri, Nigeria, Sudani zombi, u Bushinwa n’ibihugu byinshi by’Abarabu na bimwe muri Aziya.

Hari ibihugu 28 bigifite iki gihano mu mategeko yabyo ariko biri mu nzira zo kugica, ibyo birimo byinshi byo muri Afurika nka Kongo, Tanzania, Uganda, Kenya, Ethiopia n’ibindi.

Hari kandi ibihugu 105 byaciye burundu iki gihano birimo u Burundi n’u Rwanda.

Mu 2017 ikigo Amnestie International giharanira uburenganzira bwa muntu cyabaruye amadosiye 2 591 y’abakatiwe igihano cy’urupfu mu bihugu 53.

Urukiko muri Tanzania rurafata umwanzuro kuri iki gihano uyu munsi.

Kuva cyera cyane kugeza ubu, igihano cy’urupfu cyahawe abantu benshi cyane ku isi baburanishijwe cyangwa bataburanishijwe, abazwi cyane muri bo ni nka; umuhanga muri folozofia w’umuroma Marcus Tullius Cicero, impirimbanyi y’impinduramatwara Ernesto Che Guevara, perezida Saddam Hussein watwaraga Irak ndetse na Yezu/Yesu Christ (ku bemera inkuru ye).


Umugabo wo muri Arabia Saoudite anywa isegereti rye rya nyuma mbere yo kumanikwa agapfa ku cyaha cyo kwica yarezwe mu 2013

@Umubavu.com





Tanga igitekerezo kuri iyi nkuru



Igitekerezo