Sudani: Igisirikare cyahawe iminsi ntarengwa yo kuba cyashubije ubutegetsi Abasivile

Inama nkuru y’umutekano n’amahoro mu muryango w’Ubumwe bw’Ibihugu bya Afrika, AU, yategetse agatsiko k’abasirikare kafashe ubutegetsi mu gihugu cya Sudani kuba kashubije ubutegetsi abasivire mu minsi itarenze 15, bitaba ibyo Sudani igakurwa muri uwo muryango.

Mu itangazo ryasohowe nyuma y’umubonano wabereye i Addis Abeba ku murwa mukuru wa Ethiopia, iyo nama yamenyesheje ko "ubutegetsi bw’inzibacyuho buyobowe n’igisirikare bwaba butandukanye cyane n’ibyipfuzo by’abaturage ba Sudani".

Nicyo gituma yasabye ako gatsiko k’abasirikare ko "kajya ku ruhande kagasubiza ubutegetsi bw’inzibacyuho abanyepolitike b’abasivire", mu gihe kitarenze iminsi 15.

Iyo nama yamenyesheje ko mu gihe bitagenda gutyo, Sudani ishobora gufatirwa ibihano byo kudasubira kugira uruhare mu bikorwa by’Umuryango w’Ubumwe bw’Ibihugu vba Afrika kugeza ubwo ako gatsiko gashubije ubutegetsi nk’uko biteganywa n’Itegeko Nshinga ry’icyo gihugu.

Mu cyumweru gishize nibwo igisirikare cyahiritse ku butegetsi Omar Al-Bashir nyuma y’imyigaragambyo yo kumwamagana yatangiye mu kwezi kwa 12 kw’umwaka ushize wa 2018, nyuma y’imyaka hafi 30 ari ku butegetsi.

Ahmed Awad Ibn Ouf wahoze ari Minisitiri w’Uutekano mu gihugu, niwe watangaje ko ayoboye inama nkuru ya gisirikare yari yafashe ubutegetsi, gusa nyuma y’umunsi umwe ahita atangaza ko yeguye kubera imyigaragambyo yari ikomeje gufata indi ntera abayiyoboye basaba ko ubutegetsi busubizwa abasivire.

Liyetena Jenerali Abdel Fattah Abdelrahman Burhan niwe wagenywe ngo amusimbure, ariko nabyo ntibyanyuze abari mu myigaragambyo kuko kugeza ubu ikomeje abayirimo basaba ko ubutegetsi bujya mu minwe y’abasivire.

PNG - 570.8 kb
Igisirikare cyahiritse Omar Al-Bashir ku butegetsi mu cyumweru gishize nyuma y’imyaka hafi 30 ari ku butegetsi

@Umubavu.com





Tanga igitekerezo kuri iyi nkuru



Igitekerezo