Rwiyemezamirimo wabakoresheje yaburiwe irengero abarimo akayabo none babuze aho babariza-Video

Abakoze imirimo itandukanye mu mavugurura y’inyubako z’Ibitaro byitiriwe Umwami Faisal baratabaza inzego bireba nyuma yuko rwiyemezamirimo wabakoresheje bavuga ko yitwa Nzamwita Pacifique aburiwe irengero bakabura aho babariza dore ko n’umwungirije bita Deo ubu atakikoza ku kazi nyuma yuko iki kibazo kibaye yewe na Telefoni ye igendanwa ikaba iri ku murongo ariko ntayitabe, aba baturage n’imiryango yabo bakaba bari gusembera.

Icyateye ibi bibazo byose byatumye aba baturage bakomeza gusiragizwa ntibishyurwe amafaranga bakoreye, ngo ni uko rwiyemezamirimo Umushinwa waysindiye isoko yahayeakazi bakoranye nabi akaza kumwirukana bikarangira abo yakoresheje babuze uwo bishyuza.

Abaganiriye n’UMUBAVU bawubwira akababaro bose bahuriza ku kuba nta kindi bifuza uretse kwishyurwa amafaranga yabo baberewemo bityo bakikenura dore ko ngo bamwe batangiye no kubasohora mu mazu bacumbitsemo.

Aba baturage barimo abatangiye gukora iyi mirimo mu mwaka dusoje wa 2020 mu mezi y’Ugushyingo n’Ukuboza bakavuga ko batangiye bahembwa neza ariko nyuma bikagenda bipfapfana kugeza ubwo bisanze noneho babuze Noheli n’Ubunani kandi bari barabyizejwe.

Umwe muri bo ati "Baduhe amafaranga yacu tuge kuyakoresha ibikorwa twayakoreye tuyakeneye, uburyo nabaga mpanamye hariya ku gikwa hejuru, nari mfite risk yuko nahanuka nkahgwa, nari gupfa,...kuki batampemba?".

Undi ati "Nibaduhembe, ibyo twakoze biragaragara, icyongereyeho, niba basenye kampani, muri ya kampani basenye, bamwe bayikoragamo akaba ari bo n’ubundi bagikora akazi hakaba hari abari hanze reka tubahembe ayabo, abarimo hano indani tuzajya tubahemba gake gake".

Umubyeyi wo muri aba baturage avuga ko batava aha bakoreye kuko ngo nta buryo ikibazo cyabo cyakemuka baramutse bagiye, ati "Tukibaza ese nitugenda ikibazo cyacu kizakemuka gute kandi umuntu yishyuza aho yakoze".

Banakomoje ku buryo bashutswe ko uwabakoresheje ngo afungiye kuri RIB ya Kimironko nyamara bajyayo bakamubura, ati "Baba baradushutse ati ’umukoresha wanyu afungiye kuri RIB Kimironko, Kimironko ati ’musubire iyo mwakoze mwa mbwa mwe’, hariya hirya ho bari nanadukubise".

Abajijwe uwababwiraga ngo basubire iyo bakoze, ati "Ni abapolisi".

Icyakora aba baturage bavuga ko amafaranga ahari atariwe ahubwo ngo na bo ntibasobanukirwa impamvu batishyurwa ngo kabone nubwo uwabahaye akazi yaba yaraburiwe irengero yashakishwa kuko yahawe akazi azwi neza n’aho atuye kandi ngo ibi binanze hagashatswe ikindi gisubizo cyihuse ariko ntibakomeze kubirenganiramo.

UMVA AKABABARO K’ABA BATURAGE MURI IYI VIDEO:

SIBOMANA Rusiyane aba baturage bavuga ko yabakoreshaga nka ‘Kapita’ wabo ari na we wahabwaga amafaranga n’abamukuriye akabahemba, ntiyashatse kuvugana n’UMUBAVU kuri Kamera gusa kuri Telefoni igendanwa yavuze ko kuba aba baturage badahembwa ari uko uwakabahembye adahari ngo atari kuboneka icyakora ntiyavuze aho yaba aherereye.

Ati “Impamvu batishyurwa uwakabishyuye ntawuhari ntabwo ari kuboneka”.

Abashyirwa mu majwi n’aba baturage nk’abateye iki kibazo cyatumye batabasha kubona Noheli n’Ubunani ari bo Nzamwita Pacifique, uyu akaba ari Rwiyemezamirimo wahawe akazi n’Umushoramari w’Umushinwa ufite isoko ryo kuvugurura Ibitaro Byitiriwe Umwami Faical n’uwo aba baturage bita Deo umwungirije bombi nta n’umwe wabashije kuboneka ngo agire icyo avuga kuri iki kibazo.

Nzamwita Pacifique bivugwa ko afunze, gusa aba baturage babwiye UMUBAVU ko ngo bagiye aho barangiwe afungiye (kuri RIB Kimironko) ntibamubona.

Uwo bita Deo we aba baturage bavuga ko kuva iki kibazo cyabaho atakikoza ku kazi icyakora Telefoni ye igendanwa iri ku murongo ariko ntayifata.

Kayiranga Patrick ushinzwe inyubako z’Ibitaro byitiriwe Umwami Faical, yabwiye UMUBAVU ko Nzamwita Pacifique yakoranye nabi n’ufite isoko ryo kuvugurura Ibitaro bigatuma amwirukana aribwo yagiye atishyuye abakozi yakoresheje.

Ati “…bakoranye nabi aramwirukana, amwirukanye we agenda atishyuye”.

UMUBAVU ushatse kumenya niba uyu mukoresha yaba yarirukanwe ahawe amafaranga yakoreye ari na yo yagombaga guhembamo aba baturage, ati “Yeee batubwira ko yayahawe agahita agenda”.

Icyakora yijeje ko iki kibazo bari kugikurikiranira hafi hanashakishwa uyu mugabo ku buryo yijeje ko ku wa Mbere aba baturage ngo bazabona amafaranga yabo.

Ati “Turimo turabikurikirana, ku wa Mbere bazabona amafaranga yabo”.

Bamwe muri aba baturage bakoze akazi mu ivugururwa ry’ibi Bitaro byitiriwe Umwami Faical babwiye UMUBAVU ko ngo bose hamwe bishyuza amafaranga akabakaba miliyoni 10 bakaba baratangiye gukora iyi mirimo mu mwaka ushize wa 2020 by’umwihariko mu mezi y’Ugushyingo n’Ukuboza.

Rwiyemezamirimo uvuga ko ari uw’umwuga utashatse ko UMUBAVU utangaza umwirondoro we, yatanze inama z’uburyo Leta yafasha ba rwiyemezamirimo kugira ngo ibibazo nk’ibi byo kwambura abaturage bitazongera kubaho.

Ati "Jyewe ndi rwiyemezamirimo w’umwuga, nsanga ku bijyanye n’aba ba rwiyemezamirimo n’abashoramari baba baturutse hanze, inzego z’umutekano zagombye kubafasha mu kureba abantu bagiye gukorana na bo".

Akomeza ati "Ntabwo bikwiriye kugira ngo rwiyemezamirimo aze, namara kuza afate amafaranga y’umushoramari ayajyane muri projet ze, ejo mu gitondo ba bantu bakoreshejwe usange ntabwo bishyuwe".

Ibitaro byitiriwe Umwami Faisal bimaze imyaka 30 bikora kandi bivurirwamo indwara zivurwa n’ibitaro bikomeye ku isi. ubu biri kuvugururwa ku buryo bubishyira ku rwego mpuzamahanga. Ibi bitaro bizaba bifite ubushobozi bwo kuvura indwara z’umutima (kubaga) no gusimbuza impiko.

Ibi Bitaro biri mu byambere bikomeye u Rwanda rufite, biherereye mu Karere ka Gasabo mu Murenge wa Kacyiru, ubusanzwe biri mu bimaze imyaka myinshi bikora mu gihugu cy’u Rwanda.

Biteganyijwe ko aya mavugurura azaba yarangiye mu gihe cy’imyaka itarenze itanu. Mu mavugururwa yatangiye muri ibi bitro, harimo kubakwa inyubako nini izajya yakira ikanavurirwamo abarwayi.

Si ibyo gusa kuko bizajya bifasha no mu mirimo irimo iy’ubushakashatsi, kwigisha no guhugura abari kwiga ibijyanye n’ubuvuzi. Ibi bitaro kandi bizanavugurura ivuriro rizaba rishinzwe kwakira abantu bafite ubushobozi bwo hejuru n’abandi biyubashye.

Ibitaro byitiriwe Umwami Faisal biri mu btaro bizaba bihenze mu Rwanda kuko bizajya byakira n’abarwayi bavuye mu bindi bihugu nk’uko Abanyarwanda na bo bafataga indege ibajyanye kuvurizwa hanze y’igihugu.

Ibi bitaro bizuzura bitwa akayabo k’amafaranga y’u Rwanda asaga miliyari 18, bizaba bibaye igisubizo kuri benshi basiragiraga bashaka aho ababo bavurirwa.

UMVA MURI IYI VIDEO AKABABARO K’ABA BATURAGE BAKOZE MU MAVUGURURA Y’IBITARO BYITIRIWE UMWAMI FAISAL ARIKO BAKABA BATARISHYUWE NDETSE BARABUZE N’AHO BABARIZA:





Tanga igitekerezo kuri iyi nkuru



Igitekerezo
Epimaque NTAWIHEBA Kuya 8-01-2021

yewe ubuyobozi nibudufashe,turebe ko batwishyura najye narahakoze ariko habe nifaranga.