RwandAir yahagaritse ingendo zo mu Bushinwa kubera ‘Coronavirus’

Sosiyete y’u Rwanda y’ubwikorezi bwo mu kirere, RwandAir yahagaritse ingendo zayo ziva cyangwa zerekeza mu Mujyi wa Guangzhou mu Bushinwa kubera icyorezo cya Coronavirus kiri muri iki gihugu.

Ihagarikwa ry’agateganyo ry’izi ngendo rije nyuma y’aho Ishami ry’Umuryango w’Abibumbuye ryita ku Buzima (OMS), mu ijoro ryakeye ritangaje ko coronavirus ari icyorezo cyugarije isi.

Mu ijoro ryakeye ni bwo Umuyobozi mukuru wa OMS Dr Tedros Adhanom yatangaje ko icyo cyemezo cyo gufata koronavirus nk’ikiza kibasiye isi nyuma y’inama y’agataraganya yahuje abagize akanama ka OMS gashinzwe ibijyanye n’ibyorezo no kureba uburyo bibangamiye isi.

Yakomeje avuga ko kuba abafashe icyo cyemezo bitavuga gukomanyiriza u Bushinwa, ahubwo ikigamijwe ari ukugira ngpo iki cyorezo kidakomeza gusakara mu bindi bihugu n’ibifite ubushobozi buke mu bijyanye n’ubuvuzi.

Gutangaza ibihe bidasanzwe bitewe n’indwara bigendana no gutanga amabwiriza n’ubushobozi ku bihugu kugira ngo icyo cyorezo kiba cyagizwe ikiza cyibasiye isi kidakomeza gukwirakwira, hafatwa ingamba zikomeye, ariko zitabangamira ubuhahirane n’imibanire y’ibihugu.

Kugeza ubu Ikigo cy’Igihugu gishinzwe ubuzima mu Rwanda, RBC kivuga ko mu Rwanda iki cyorezo kitarahagaragara.

Coronavirus ishobora kuba icyorezo gishobora kuzaba gikomeye muri iki kinyacumi Isi itangiye, mu gihugu cy’u Bushinwa aho cyatangiriye, uyu munsi hatangajwe ko kimaze guhitana abagera muri 213 mu gihe abamaze kucyandura ari 9 692.

Iyi ndwara kandi imaze kugera mu bihugu bitandukanye bigera kuri 21.

Dore imibare y’abamaze kuyandura muri buri gihugu yagaragayemo:

China – 9,692

Japan – 14

Thailand – 14

Singapore – 13

South Korea – 11

Australia – 9

Malaysia – 8

Taiwan – 8

France – 6

United States – 6

Germany – 5

Vietnam – 5

United Arab Emirates – 4

Canada – 3

Italy – 2

Cambodia – 1

Finland – 1

India – 1

Nepal – 1

Philippines – 1

Sri Lanka – 1

Indwara ya coronavirus iteye ite?

Koronavirusi ni iki?

Koronavirusi ni umuryango mugari wa za virusi zitera indwara zitandukanye harimo ibicurane bisanzwe n’ibicurane bikomeye bita “Acute Respiratory Syndrome(SARS-CoV) n’ibyo bita “Middle East Respiratory Syndrome(MERS-CoV)”.

Ibimenyetso by’iyo ndwara bigaragarira mu buhumekero, kugira umuriro, kuzana ibimwira, gukorora no guhumeka nabi. Rimwe na rimwe hari ubwo bikomera umuntu akarwara umusonga, impyiko ndetse bikaba byanamuviramo urupfu.

Iyo ndwara yandura ite?

Umuntu yanduzwa Koronavirusi n’uwayanduye:

• Yandurira mu mwuka wahumetswe n’uwakoroye ayanduye;

• Yandura iyo umuntu akoze ku wayanduye cyangwa amusuhuje;

• Yandura iyo umuntu akoze ku kintu cyangwa ahantu hari iyo virusi noneho agakora ku munwa, ku izuru cyangwa ku maso mbere yo gukaraba intoki; • Rimwe na rimwe ishobora kwandurira mu mwanda wo mu musarani

Koronavirusi iravurwa igakira?

Nta muti wihariye uvura iyo ndwara. Igishoboka kugeza ubu kuyivura batanga imiti ifasha mu guhangana n’ibimenyetso byayo:

• Antibiyotike zivura udukoko twa bagiteri zitera umusonga;

• Imiti igabanya ubukana bw’iyo virusi;

• Gufasha umurwayi guhumeka bamwongerera umwuka wa ogisijene.

Kuki Koronavirusi nshya ari ikibazo?

• Kuko iki cyorezo kimaze kugaragara mu Bushinwa, Tayilande, Ubuyapani, na Koreya y’Amagepfo kandi kuri ubu hakaba abantu bagera kuri 205 bamaze kuyandura;

• Ibizamini bya laboratwari byagaragaje ko iki cyorezo giterwa na koronavirusi nshya kandi bikaba byemejweko abantu bashobora kuyanduzanya;

• Kuko hari urujya n’uruza rw’ ingendo z’ indege hagati y’u Rwanda n’ibihugu byinshi harimo n’ibyamaze gufatwa. Hashobora kuba ibyago byo kuba iyo virusi yagera mu Rwanda.

Irebere na Video utapfa gusanga ahandi: Nanjye mbona bamfatiyeho imbunda-Theophile wari umuyobozi muri FDU-Inkingi yahishuye uburyo yafashwe agafatirwaho imbunda n’iyicarubozo yakorewe- Byose ni muri iyi Video:

,





Tanga igitekerezo kuri iyi nkuru



Igitekerezo