Rusesabagina yareze umuvugabutumwa, GainJet Aviation n’u Rwanda gufatanya ’kumushimuta’

Paul Rusesabagina kuri ubu ufungiye mu Rwanda, yajyanye mu nkiko Sosiyete y’indege ya GainJet Aviation yo mu gihugu cy’u Bugereki n’umuvugabutumwa witwa Costantin Niyomwungere abashinja gufatanya n’u Rwanda kumushimuta.

Rusesabagina bivugwa ko yafatiwe ku kibuga cy’indege mpuzamahanga cya Kigali kiri i Kanombe mu mpera za Kanama, Urwego rugenza ibyaha mu Rwanda ruzwi nka RIB rumwereka abanyamakuru ku wa 31 Kanama uyu mwaka.

Ni mu gihe umuryango wa Rusesabagina wakunze kuvuga ko uyu mugabo yashimuswe na leta y’u Rwanda imufatiye i Dubai muri Leta zunze ubumwe z’Abarabu, mu gihe u Rwanda rwo rwakunze kuvuga ko ngo ari we wizanye i Kigali.

Mu kiganiro yahaye The New York Times, Rusesabagina we yavuze ko yavuye ku Kibuga cy’Indege cya Al Maktoum i Dubai ari mu ndege bwite yo mu bwoko bwa Bombardier Challenger 605 ya GainJet, “yari yakodeshejwe n’umuntu uturuka i Burundi”, ikaza kumugeza i Kigali.

Rusesabagina wavuze ko yafashwe azi ko ari i Burundi, yabwiye iki gitangazamakuru ko yari agiye kubonana na Costantin Niyomwungere wari wamutumiye kugira ngo aganirize amatorero ye.

Ati "Nari natumiwe n’umuntu nitaga inshuti, wiyita Musenyeri cyangwa intumwa, yari yantumiye kugira ngo nganirize amatorero ye, ngo mbaganirize kuri ‘Hotel Rwanda’. Izina rye ni Constantin Niyomwungere".

Mu kirego cy’amapaji 90 Rusesabagina n’umuryango we batanze mu rukiko rwa Texas muri Leta Zunze Ubumwe za Amerika, bavuze ko indege y’iyi Sosiyete ari yo yakoreshejwe mu kumushimuta mbere yo kwisanga i Kigali.

Ikirego nk’iki ni na cyo cyatanzwe mu rukiko rwa San Antonio barega Apôtre Niyomwungere Costantin gukorana na leta y’u Rwanda mu kumushimuta.

Rusesabagina n’umuryango we bavuga ko ruriya rubanza "rukomoka ku mugambi mubisha wa guverinoma y’u Rwanda n’abaregwa GainJet na Constantin Niyomwungere, bohereje Rusesabagina [mu Rwanda] mu buryo butemewe n’amategeko, bamufunga nta mpamvu banamwica urubozo."

Rusesabagina, umugore we n’abana babo batandatu bose bareze muri uru rubanza, bagashinja ubutegetsi bw’u Rwanda kwica uburenganzira bwa muntu no guhungabanya demokarasi binyuze mu guhashya amashyaka atavuga rumwe n’ubutegetsi.

Bunzemo bati "Kwibasira Bwana Rusesabagina byiyongereye bitewe nuko yabaye umuntu uzwi ku rwego mpuzamahanga uharanira uburenganzira bwa muntu, kandi wamagana ihohoterwa rya guverinoma y’u Rwanda, harimo kuba Rusesabagina yarashyigikiye Mapping Report y’Umuryango w’Abibumbye mu mwaka wa 2010."

Bavuze ko kandi kubera kunenga ubutegetsi bw’u Rwanda, "Rusesabagina yaje gutotezwa, aterwa ubwoba, habaho umugambi wo kugerageza kumwica ndetse n’ibikorwa byo kumusebya bimaze imyaka irenga 10" bavuga ko bikorwa n’ubutegetsi bw’u Rwanda ndetse n’itangazamakuru ryabwo.

Paul Rusesabagina kuri ubu ufungiwe mu Rwanda, aregwa ibyaha birimo iterabwoba, gutera inkunga imitwe y’iterabwoba, gushyira abana mu mitwe yitwara gisirikare, gushimuta, gutwika no kurema imitwe y’iterabwoba.

Urukiko Rukuru mu rugereko rwihariye ruburanisha ibyaha mpuzamahanga n’ibyambukiranya imipaka ruherereye mu Karere ka Nyanza mu majyepfo y’u Rwanda, ruheruka kwanzura ko dosiye ya Rusesabagina ihuzwa n’iya Nsabimana Callixte uzwi nka Sankara wari Umuvugizi w’Umutwe wa FLN n’iya Nsengimana Herman wamusimbuye kuri uwo mwanya cyo kimwe n’abandi 17 baregwa hamwe nyuma yo gusanga ngo hari ibyaha bahuriyeho.

Bikaba bteganyijwe ko urubanza rwabo ruzatangira kuburanishwa mu mizi tariki ya 26 Mutarama umwaka utaha wa 2021.

Perezida Kagame yigeze kuvuga ku ifatwa rya Rusesabagina

Ubwo yavugaga ku ifatwa rya Paul Rusesabagina weretswe abanyamakuru ku wa 31 Kanama 2020, Perezida Paul Kagame yavuze ko "ushobora kwizana ubishaka uzi n’icyo ukora icyo ari cyo, ushobora [no] kwizana wabeshywe ukisanga hano".

"... Ariko uwanabwira n’abantu ko ari we wanizanye, ubwo urubanza rwaba ruri hehe? Rwaba ruri kuri nde?"

Perezida Kagame yakomeje agira ati "Byabaye nko guhamagara nimero ya Telefone ukaza gusanga wibeshye nimero wahamagaye. Kandi inzego zabigizemo uruhare zambwiye ko nta nenge yabayemo".

Mu kiganiro Perezida Kagame yatanze kuri Radio na Televiziyo y’u Rwanda muri Nzeli, yavuze ko "ubwo icyaha ni icyo kubeshya gusa, ntabwo ari ikindi kibazo".

"Kuko kuva aho yavuye kurinda agera hano, nta cyaha cyigeze gikorwa hagati aho ngaho na kimwe".

Umuryango wa Rusesabagina wo wakunze kumvikana uvuga ko yashimutiwe i Dubai muri Emira Zunze Ubumwe z’Abarabu (UAE), ibyo umutegetsi wo muri icyo gihugu utaratangajwe izina wavuganye na Televiziyo CNN yahakanye.

Muri iki kiganiro cyo muri Nzeli Perezida Kagame yagiranye na RBA, bwari bwo bwa mbere yari agize icyo avuga ku mugaragaro ku ifatwa rya Bwana Rusesabagina wamenyekanye nyuma yo gushingirwaho inkuru itavugwaho rumwe ya filimi Hotel Rwanda y’abo bivugwa ko bemeje ko yabarokoye muri Hôtel des Mille Collines muri Jenoside yakorewe abatutsi mu Rwanda muri Mata 1994.

Paul Rusesabagina w’imyaka 66 y’amavuko, aregwa n’u Rwanda ibyaha 13 bishingiye ku iterabwoba.

Rusesabagina ni umukuru wungirije w’ihuriro ry’amashyaka ya politiki atavuga rumwe na leta MRCD-Ubumwe, ihuriro rifite umutwe wa gisirikare wa FLN ukorera mu burasirazuba bwa DR Congo.

Mu 2018, uyu mutwe wa FLN wigambye ibitero ku butaka bw’u Rwanda ahegereye ishyamba rya Nyungwe, ibitero byaguyemo abantu.

Perezida Kagame yavuze ko ibyo byuko hari abo yarokoye byakomeza bikagibwaho impaka, ariko ko ngo atari icyaha cyashingirwaho urubanza mu nkiko.

Yavuze ko akurikiranyweho kuba ari mu mitwe "igirira nabi Abanyarwanda".

Perezida Kagame yagize ati "Amaraso y’Abanyarwanda afite ku ntoki ze kubera ibyakozwe n’iyo mitwe navugaga, ibyo ngibyo ni ibigomba gusubizwa byanze bikunze".


Rusesabagina muri Kanama ubwo yari ajyanwe kwerekwa abanyamakuru


Ubwo Paul Rusesabagina yerekwaga abanyamakuru muri Kanama, byabaye mu gihe cy’umwanya muto ndetse ntiyahawe umwanya wo kugira icyo avuga

UMUDIPOLOMATE YIYICIYE ABANA BE BABIRI, URUBANZA RW’UMUNYEMARI NKUBILI MU ISURA NSHYA N’ANDI MAKURU MENSHI NI K’UMUBAVU TV ONLINE:





Tanga igitekerezo kuri iyi nkuru



Igitekerezo