Rusesabagina aritaba urukiko kuri uyu wa Mbere, umutekano wakajijwe

Kuri uyu wa Mbere tariki ya 14 Nzeri 2020, nibwo Paul Rusesabagina yitaba urukiko rw’ibanze rwa Kicukiro ruri mu Kagarama mu Karere ka Kicukiro mu Mujyi wa Kigali kugira ngo aburane ku ifungwa n’ifungurwa by’agateganyo ku byaha birimo iby’iterabwiba ashinjwa.

Nkuko amakuru UMUBAVU ukesha abari ku rukiko abivuga, umutekano wakajijwe aho n’imirimo hafi ya yose kuva mu gitondo cy’uyu wa Mbere kugeza saa munani z’amanywa.yasubitswe kubera urubanza rwa Paul Rusesabagina ku masaha yo mu Rwanda no mu Burundi.


Umutekano wakajijwe ku rukiko rw’Ibanze rwa Kicukiro ruri mu Kagarama

Abanyamakuru batoranyijwe bakanapimwa Covid-19 muri iki gitondo, ni bo bemerewe gukurikirana uru rubanza, abandi bahejejwe hanze ndetse basabwa kuva hafi y’urukiko.

Nibwo bwa Mbere Paul Rusesabagina agiye kugezwa imbere y’urukiko. Yaje yambaye isuti (Costume) y’ikigina yambaye amapingu kandi akikijwe n’abapolisi benshi.

Ni nyuma y’ibyumweru bibiri yeretswe abanyamakuru i Kigali ko yafashwe, mu buryo butavugwaho rumwe hagati ya leta n’uruhande rw’abo mu muryango we.

Rusesabagina w’imyaka 66, yamenyekanye nyuma yo gushingirwaho inkuru ya filimi Hotel Rwanda y’abemeje ko yabarokoye muri Hôtel des Mille Collines muri Jenoside yo mu Rwanda mu 1994.

Uyu mugabo aregwa n’u Rwanda ibyaha byo "kuyobora umutwe n’ihuriro ry’imitwe y’iterabwoba yitwara gisirikare igizwe n’abahezanguni…".

Rusesabagina ni umukuru wungirije w’ihuriro ry’amashyaka ya politiki atavuga rumwe na leta MRCD-Ubumwe, ihuriro rifite umutwe wa gisirikare wa FLN ukorera mu burasirazuba bwa DR Congo.

Mu 2018, umutwe wa FLN wigambye ibitero ku butaka bw’u Rwanda ahegereye ishyamba rya Nyungwe, ibitero byaguyemo abantu. U Rwanda ruvuga ko ibyaha aregwa bishingiye kuri ibyo bitero.

Byamenyekanye ko Rusesabagina afunzwe n’u Rwanda ku itariki ya 31 Kanama 2020 ubwo urwego rugenza ibyaha mu Rwanda, RIB rwamwerekaga abanyamakuru mu gihe cy’umwanya muto, ntiyahawe umwanya wo kugira icyo avuga.

Umuryango uharanira uburenganzira bwa muntu, Human Rights Watch (HRW), uvuga ko ifatwa rya Paul Rusesabagina uri mu bakomeye batavuga rumwe n’ishyaka riri ku butegetsi mu Rwanda (FPR) ryakozwe mu buryo bwo "gushimutwa ku ngufu".

Uvuga ko ibyo ari ihonyorwa rikomeye ry’amategeko mpuzamahanga.

Mu itangazo HRW yasohoye kuri uyu wa Gatanu w’icyumweru gishize, ivuga ko leta y’u Rwanda ikwiye guhita yemerera Bwana Rusesabagina kubonana n’abo kumwunganira mu mategeko yahisemo, akaganira na bo mu ibanga kandi akajya avugana n’umuryango we mu buryo buhoraho.

Mu kiganiro yatanze kuri Radio na Televiziyo y’u Rwanda mu minsi ishize, Perezida Kagame yavuze ko kuva aho Rusesabagina "yavuye kurinda agera hano, nta cyaha cyigeze gikorwa hagati aho ngaho na kimwe".

HRW ivuga ko akwiye guhita yemererwa gukoresha uburenganzira bwe bwo guhinyuza mu mategeko uburyo yafashwemo, akaburanirwa n’abanyamategeko yihitiyemo.

Kandi ngo akaburanishwa mu rukiko rwigenga rukurikiza amategeko mpuzamahanga ajyanye n’uburenganzira bwa muntu.

David Rugaza uri mu bari kumwunganira ubu, yabwiye BBC ko Rusesabagina yamuhisemo ku bushake kandi "afite uburenganzira bwo kumugumana cyangwa kumureka agafata abandi".

HRW ivuga ko kuba na mbere yuko urubanza rutangira, Perezida Kagame yaravuze ko Bwana Rusesabagina afite "amaraso y’Abanyarwanda ku ntoki ze kubera ibyakozwe" n’imitwe nka FLN, bibangamiye ko habaho ubutabera.

Ubu hari amatsinda abiri y’abunganizi be mu mategeko

Iryo mu Rwanda rivuga ko yarihisemo ariko ritemerwa n’umuryango wa Rusesabagina, n’irindi ririmo n’abanyamahanga ryatoranyijwe n’umuryango we ariko rivuga ko ryangiwe n’u Rwanda kumwunganira.

Kuri uyu wa Mbere Rusesabagina aragezwa imbere y’urukiko, ahitezwe ko ashobora kugira icyo avuga ku bazamwunganira mu rubanza rwe.

HRW ivuga ko ihonyorwa ry’uburenganzira bwa Paul Rusesabagina riteye impungenge zo kwibaza niba azahabwa ubutabera mu rubanza.

Turaza kubagezaho uko iburanisha ryagenze....

Human Rights Watch iravuga ko "Paul Rusesabagina yashimuswe ku ngufu", uwunganira Sankara ntahuza na we ku byo gutegereza urubanza rwa Rusesabagina kuko ngo byabasubiza inyuma:





Tanga igitekerezo kuri iyi nkuru



Igitekerezo