Rulindo: Umugabo yafashwe akekwaho ubujura bw’amabuye y’agaciro

Polisi y’u Rwanda ikorera mu karere ka Rulindo, kuwa mbere ku itariki ya 30 Mata yataye muri yombi umugabo witwa Ntibarikure Phillipe w’imyaka 55 afite ibiro 62 by’amabuye y’agaciro yo mu bwoko bwa Gasegereti nta byangombwa byayo afite.

Umuvugizi wa Polisi mu Ntara y’Amajyaruguru Chief Inspector of Police (CIP) Hamdun Twizeyimana, yavuze ko uyu mugabo yafatiwe mu mudugudu wa Kanunga akagari ka Kabuga mu murenge wa Masoro, aya mabuye akaba yari ayajyanye ahantu hataramenyekana, ubu akaba yarashyikirijwe Urwego rw’Igihugu rushinzwe ubugenzacyaha (RIB) rukorera kuri Sitasiyo ya Polisi ya Murambi ari naho abaye afungiye.

Yavuze ati:”Twahawe amakuru n’abaturage ko Ntibarikure afite amabuye ya Gasegereti batazi inkomoko yayo kandi nta byangombwa byayo afite, tujya kumureba koko turayamusangana.”

CIP Twizeyimana yavuze ko uyu mugabo yatawe muri yombi hakurikijwe amabwiriza ya Minisitiri no 001/minifom/2011 yo kuwa 10 Werurwe 2011 yo kurwanya forode mu bucuruzi bw’amabuye y’agaciro, aho ingingo ya mbere y’aya mabwiriza ivuga ko nta muntu wemerewe kugura cyangwa gucuruza amabuye y’agaciro atanditse mu bitabo by’ubucuruzi.

Yavuze kandi ko Urwego rw’Igihugu rushinzwe ubugenzacyaha (RIB) arirwo ruzemeza niba uyu mugabo yari afite aya mabuye mu buryo bwemewe n’amategeko cyangwa niba yari yaribwe mu rumwe mu nganda zemerewe gucukura amabuye y’agaciro.

CIP Twizeyimana yibukije ko ubucuruzi nk’ubu bwa forode bugira ingaruka zirimo kudindiza ubukungu n’iterambere by’igihugu, aboneraho gusaba buri wese kwirinda iki cyaha no kugira uruhare mu kukirwanya, atanga amakuru atuma gikumirwa no gufata abagikoze.

Yagize ati:"Amafaranga ava mu misoro n’amahoro akoreshwa mu kubaka ibikorwaremezo nk’imihanda, amashuri, ibitaro, n’ibindi. Kubinyereza bigira ingaruka ku bukungu n’iterambere muri rusange."

Ingingo ya 438 yo mu gitabo cy’amategeko ahana ibyaha mu Rwanda ivuga ko umuntu wese wiha gukora ubucuruzi bw’amabuye y’agaciro bitemewe n’amategeko, ahanishwa igifungo kuva kumezi atandatu (6) kugeza ku mwaka umwe (1) n’ihazabu y’amafaranga y’u Rwanda kuva kuri miliyoni eshatu (3.000.000) kugeza kuri miliyoni icumi (10.000.000).





Tanga igitekerezo kuri iyi nkuru



Igitekerezo