Rubavu: Ntibisanzwe !Gitifu w’umurenge yirukanwe azira ishyamba

Ubuyobozi bw’Akarere ka Rubavu bwahagaritse Umunyamabanga Nshingwabikorwa w’Umurenge wa Nyakiriba, Hagenimana Epimaque, bumushinja guhishira abacukura amabuye y’agaciro bakanatema ibiti mu ishyamba rya Gishwati.

Ishyamba rya Gishwati rikora ku Turere tune mu Ntara y’Iburengerazuba turimo Rutsiro, Rubavu, Nyabihu na Ngororero.

Umuyobozi w’Akarere ka Rubavu, Habyarimana Gilbert, yabwiye Igihe ko Gitifu wa Nyakiriba bamuhagaritse amezi atatu mu gihe bagikora iperereza.

Yagize ati “Twamuhagaritse amezi atatu nk’uko biteganwa n’itegeko mu gihe tugishakisha amakuru ku makosa ashinjwa, narangira nibwo tuzafata umwanzuro wa nyuma.”

Uyu muyobozi yahagaritswe nyuma yo gusabwa ibisobanuro mu nyandiko ariko ubuyobozi bw’akarere ntibunyurwe n’ibisobanuro yatanze.

Ishyamba cyimeza rya Gishwati ni igice kimwe mu bigize Pariki y’Igihugu ya Gishwati-Mukura. Icyanya cya Gishwati gifite ubuso bwa Hegitari 1 570 mu gihe icya Mukura gifite Ha 1 988.

Hariho n’akarere k’ubuhumekero kagizwe na hegitari 266 z’ubuhumekero bwa Gishwati na hegitari 696 z’ubuhumekero bwa Mukura.

Pariki z’igihugu zibarirwa mu mashyamba ya Leta akomye.

Amabwiriza ya Minisitiri agena uburyo amashyamba yo mu karere k’ubuhumekero bwa za Pariki, ayo mu nkengero z’imigezi, inzuzi n’ibiyaga asarurwa cyangwa akurwamo ibiyakomokamo, utabyubahirije akamburwa uburenganzira yahawe kandi agategekwa gusana ibyo yangije byatewe n’ibikorwa bye cyangwa gukoresha nabi uruhushya yahawe.

Umubavu.com





Tanga igitekerezo kuri iyi nkuru



Igitekerezo