Rtd Major Mudathiru n’abo bareganwa basabiwe gufungwa burundu

Maj (Rtd) Mudathiru Habib n’abo baregwa hamwe ibyaha birimo gushaka kugirira nabi ubutegetsi buriho, kuri uyu wa Mbere tariki ya 07 Ukuboza 2020, Ubushinjacyaha bwa Gisirikare bwabasabiye gufungwa burundu.

Ubushinjacyaha bumaze iminsi buvuga ijambo rya nyuma ku kirego cyabwo, kuri uyu wa Mbere bwasabye Urukiko Rukuru rwa Gisirikare guhamya ibyaha abantu 32 barimo Maj (Rtd) Mudathiru Habib, rukabahanisha gufungwa burundu.

Umushinjacyaha wa Gisirikare waburanye uru rubanza yagarutse ku byaha biregwa aba bagabo bafatiwe mu mitwe ihungabanya umutekano w’u Rwanda birimo kurema umutwe witwaje intwaro ndetse n’iterabwoba, yabwiye Urukiko ko Ubushinjacyaha bukurikije ibimenyetso byagezweho mu iperereza, bariya bagabo ngo bakwiye guhamwa n’ibyo bashinjwa.

Yagarutse ku bihano biteganyirizwa buri cyaha, avuga ko nk’icyaha cyo kurema umutwe witwara gisirikare, Umushinjacyaha yavuze ko Urukiko rwazabahanisha igifungo cy’imyaka icumi (10).

Umushinjacyaha kandi yavuze ko ku cyaha cyo gushaka kugirira nabi ubutegetsi buriho, Urukiko rwazabahanisha gufungwa burundu kuri bariya bantu bose uko ari 32 baregwa muri uru rubanza.

Uyu mushinjacyaha w’Igisirikare cy’u Rwanda wanagarutse kuri bimwe mu bikorwa byakozwe n’imitwe ihungabanya u Rwanda birimo ibitero byagabwe mu bice binyuranye birimo iby’i Kinigi mu Karere ka Musanze n’ibyo mu ishyamba rya Nyungwe, yibukije ko byahitanye ubuzima bw’Abanyarwanda.

Yasabye Urukiko kugendera ku biteganywa n’Itegeko riteganya ibyaha n’ibihano mu Rwanda ko iyo uregwa akurikiranyweho impurirane z’ibyaha, ahanishwa igihano kiruta ibindi, bityo ko abaregwa uko ari 32 bose bazahanishwa gufungwa burundu.

Ubwo abaregwa baburanaga, Ubushinjacyaha bwakunze kugaruka ku bikorwa bishinjwa bariya bagabo ndetse buvuga ko iriya mitwe babagamo irimo P5 ya Kayumba Nyamwasa ngo yagiye iterwa inkunga n’igisirikare cy’u Burundi.

Ni mu gihe abaregwa bo bakunze kumvikana bashima Leta y’u Rwanda uburyo ngo bafatiwe mu mashyamba bakazanwa mu Rwanda ntibanagirirwe nabi ahubwo ngo bagafatwa neza mu gihe bari bagambiriye kurugirira nabi.

Uyu munsi ubwo bari bamaze gusabirwa gufungwa burundu, bongeye kugaragaza kwicuza ku bikorwa byo gushaka kugirira nabi u Rwanda binjiyemo.

Ibyaha baregwa ni ukwinjira mu mitwe y’abarwanyi itemewe, ubugambanyi bugamije kugirira nabi ubutegetsi buriho, umubano n’ibindi bihugu ugamije gushoza intambara mu gihugu no kurema umutwe w’abagizi ba nabi.

Nyuma yo kumenyeshwa umwanzuro w’Ubushinjacyaha, abaregwa bazakomeza kugaragaza imyanzuro yabo banasaba ibyo urukiko rwazibandaho mu kubacira urubanza. Ni igikorwa kizasozwa kuri uyu wa Kabiri, hagatangazwa itariki urubanza ruzasomerwaho.

ABA BANNYAHE BATI "NTABWO TURWANYA LETA, USHAKA INZU BAYIMUHE", ABANA NIBAMARA KUBYARIRA MU RUGO NTITUZABANIGA:





Tanga igitekerezo kuri iyi nkuru



Igitekerezo