RDC: Abantu batanu baguye mu mpanuka y’indege

Abantu bagera kuri batanu baguye mu mpanuka y’indege yo mu bwoko bwa Antonov ya kompanyi y’indege yo muri Repubulika iharanira Demokarasi ya Congo, yabereye hafi y’umupaka w’iki gihugu na Angola kuri uyu wa gatanu, itariki 27 Nyakanga.

Iyi ndege ya kompanyi y’indege ya Air Kasai, yamanutse butosho nyuma y’akanya gato ihagurutse mu Mujyi wa Kamako, mu majyepfo ya Congo, yerekeje mu Mujyi wa Tshikapa, mu birometero 150 mu majyaruguru.

Nk’uko byatangajwe n’Umuyobozi wa Teritwari ya Tshikapa, Jean-Paul Kuzo, ngo abantu babiri bari muri iyi ndege babashije kurokoka bajya kuvurizwa ku Bitaro Bikuru bya Kamako, mu gihe abandi bantu batanu bahasize ubuzima.

Iyi ndege ikaba yaguye mu ishyamba riri mu birometero bitatu uvuye mu Mujyi wa Kamako, mu barokotse babiri hakaba harimo umupilote wari utwaye indege n’umugenzi nk’uko bitangazwa n’ubuyobozi.

Guverineri w’Intara ya Kasai ku ruhande rwe nk’uko bitangazwa na Kinshasatimes, yavuze ko abantu barindwi ari bo bari bari mu ndege, ariko yirinda gutanga imibare y’abaguye mu mpanuka avuga ko agitegereje amakuru.

Uyu muyobozi akaba yavuze ko icyateye impanuka kitaramenyekana, mu gihe ababibonye bo bavuga ko muri iyi ndege hari harimo ubintu birimo lisansi hagakekwa ko ari byo byateje impanuka.





Tanga igitekerezo kuri iyi nkuru



Igitekerezo