Premier League yahagaritswe kubera Coronavirus

Ubuyobozi bwa Shampiyona y’Umupira w’Amaguru mu gihugu cy’u Bwongereza izwi nka ’Premier League’, bumaze gutangaza ko inama yahuje abagize iri rushanwa yemeje ko rihagarikwa kubera inama z’abaganga n’uko ibintu byifashe ubu kubera icyorezo cya Coronavirus.

Icyorezo cya Coronavirus gikomeje gutuma hahagarikwa ibikorwa binyuranye bihuriramo abantu benshi ku isi, birinda ikwirakwira ryayo.

Premier League yatangaje ko ku bwumvikane n’Ishyirahamwe ry’Umupira w’Amaguru mu Bwongereza (FA) hanahagaritswe andi marushanwa.

Ayo ni; English Football League, Championship, FA Women’s Super League ndetse na FA Cup.

Itangazo ryabo rivuga ko icyifuzo ari uko imikino ya Premier League yasubukurwa tariki 04 z’ukwezi gutaha kwa Kane.

Richard Masters uyobora Premier League yavuze ko "hejuru ya byose, twifuriza Mikel Arteta na Callum Hudson-Odoi gukira vuba, n’abandi bose bagezweho na Covid-19".

Callum Hudson-Odoi ni umukinnyi wa Chelsea FC na we basanzemo iyi ndwara, kimwe na Arteta umutoza mukuru wa Arsenal.

Premier League ivuga ko izamenyesha amakuru mashya mu gihe nyacyo ku mikino y’iri rushanwa rifatwa nk’irya mbere rikunzwe cyane ku isi mu mupira w’amaguru.

Amarushanwa y’umupira w’amaguru mu Butaliyani na Espagne na yo yamaze guhagarikwa kubera iki cyorezo.

Mukamasabo Emeritha aratabaza Perezida Kagame ku bikoresho bye byashangukiye muri Kontineri kuva mu 2015 ubwo byafatirwaga n’Umurenge wa Masaka asohorwa mu nzu ye ku ngufu:





Tanga igitekerezo kuri iyi nkuru



Igitekerezo