Polisi yafashe umuhungu wa ’El Chapo’ bayiminjaho amasasu imurekura yumva itabona

Imirwano ikomeye yabaye mu mujyi wa Culiacán mu Majyaruguru ya Mexique ubwo ingabo n’abapolisi bafataga umwe mu bahungu ba Joaquín ’El Chapo’ Guzmán, bikomeye baramurekura.

Ni imirwano yamaze amasaha menshi ejo ku wa Kane nyuma y’uko Ovidio Guzmán López yari afashwe n’abapolisi muri uyu mujyi.

Amashusho ya Televiziyo y’igihugu yagaragaje abagabo bafite imbunda barasana na Polisi, imodoka zahiye n’imirambo mu mihanda.

Polisi yaje kurekura Ovidio Guzmán ngo imirwano ihagarare nk’uko abategetsi babivuga.

Minisitiri w’Umutekano, Alfonso Durazo yatangaje ko Polisi yarashweho bikomeye aho yari ifungiye Ovidio Guzmán biba ngombwa ko isubira inyuma ngo ikize ubuzima.

Ovidio Guzmán nyuma yahise arekurwa kugira ngo hagaruke ituze muri aka gace nk’uko Bwana Durazo abivuga.


Ovidio Guzmán López afatwa nk’uwasimbuye se

Ibyabaye byatumye Perezida w’iki gihugu Andrés Manuel López atumiza inama yo kubiganiraho.

Uyu mutegetsi yashyizeho itsinda ry’ingabo zihariye ryo kurwanya abacuruza ibiyobyabwenge.

Ku gihe cya "El Chapo" itsinda ryitwa Sinaloa cartel yari ayoboye niryo ryari rinini cyane ricuruza ibiyobyabwenge muri Amerika nk’uko abiregwa aho afungiye muri Amerika.


Abasirikare n’abapolisi barasanye n’abantu bakorana na Guzman kugeza bamurekuye

Mu gihe "El Chapo" afunze, bivugwa ko ubucuruzi bwe ubu igice kinini cyabwo gikuriwe n’umuhungu we Ovidio Guzmán w’imyaka 29.

Ubwo yari amaze gufatwa na polisi abantu benshi bakorana nawe bagabye igitero gikomeye kuri Polisi kugira ngo bamubohoze.

Ovidio Guzmán na we ari ku rutonde rw’abashakishwa na Leta ya Amerika, ashinjwa kuba ayoboye abohereza ibiyobyabwenge muri iki gihugu.

Imirwano ya polisi n’abantu ba Bwana Guzmán yakwiriye mu mujyi wa Culiacan, hari amafoto agaragaraza abantu bayiguyemo n’abapolisi bakomeretse.

Mu gihe imirwano yari irimbanyije muri uyu mujyi, abategetsi b’aka gace batangaje ko hari umubare w’imfungwa zahise zitoroka gereza ya Aguaruto.

Abashinzwe umutekano bahisemo guhita barekura Ovidio Guzmán kugira ngo imirwano ihoshe.


Habaye imirwano ikomeye yatumye ubuzima mu mujyi busa n’ubuhagaze


Mu mujyi wa Culiacán abakorana na Guzman batwitse imodoka bafunga umuhanda





Tanga igitekerezo kuri iyi nkuru



Igitekerezo