Polisi y’u Rwanda irakangurira abagenzi guharanira uburenganzira bwabo

Polisi y’u Rwanda irakangurira abagenzi, cyane cyane abagenda mu modoka zitwara abagenzi rusange guharanira uburenganzira n’agaciro byabo.

Ibi bivuzwe kubera ko abantu bagenda mu modoka za rusange mu Mujyi wa Kigali ndetse no hanze yawo, abatwara izo modoka ubasangana ingeso yo gutendeka abantu, bakabapakira nkaho ari imizigo nabo bakicecekera, kandi nyamara uwo mushoferi aba ashyira ubuzima bwabo mu kaga, kuko ikibivamo nta kindi uretse urupfu, gukomereka n’ibindi byago.

Nyamara, abagenzi baramutse bafashe ingamba zo kwanga gutwarwa gutyo nk’intama zijyanywe mu ibagiro, bakanga gutendekwa ndetse n’ababonye aho bicara bakanga ko babatendekeraho byabarinda impanuka.

Urugero rufatika ni aho kuwa kane tariki ya 4 Mutarama, ishami rya Polisi y’u Rwanda rishinzwe umutekano wo mu muhanda rikorera mu karere ka Rubavu ryafashe imodoka Coaster RAD 492 B ya Sosiyete ishinzwe gutwara abantu n’ibintu yitwa La Colombe, ikaba yari itwawe n’umushoferi witwa Karangwa Emmanuel yajvaga mu kigo abagenzi bategeramo imodoka cya Rubavu yerekeza ku ruganda rwenga inzoga rwa Gisenyi itendetse abantu 10.

Nyuma yo gufatwa, umupolisi ushinzwe guhuza ibikorwa bya Polisi n’iby’abaturage hagamijwe gukumira no kwirinda ibyaha (DCLO) Inspector of Police (IP) Solange Nyiraneza yaganirije abantu bari barimo abasaba guharanira uburenganira bwabo, birinda gutendekwa no gutendekerwaho ndetse no kubuza abashoferi gukora andi makosa.

Yarababwiye ati:”Ntimukwiye kwemera ko abashoferi bakora amakosa nk’aya, mufite uburenganzira bwo kugenda mwicaye neza ntawe ubabyiga kandi mukamenya ko imodoka iba ifite ubwishingizi bw’abantu yemerewe gutwara gusa.”

Yakomeje ababwira ati:”Ntibikwiye rwose ko intebe y’imodoka yagenewe imyanya 4 usanga yicaweho n’abantu 5 cyangwa 6, ndetse abandi bakagenda bahagaze hejuru y’abandi, umuntu wishyuye amafaranga ye yemera ate kugenda ahagaze cyangwa abyigana kugirango imodoka ikorere amafaranga menshi? Ibi ntimukwiye kubyemera.”

IP Nyiraneza yasabye abagenzi ko babonye umushoferi utendetse cyangwa akora andi makosa bakwiye kujya bandika nimero z’iyo modoka bakazibwira abashinzwe umutekano wo mu muhanda kugirango bakumire impanuka zishobora guhitana ubuzima bw’abantu, hanyuma ba nyiri amakosa nabo bagafatirwa ibihano.

Nyuma yo kuganirizwa, umwe mu bagenzi witwa Mukangwije Catheline yashimye Polisi avuga ati:”Muradukoreye kuba muduhwituriye aba bashoferi, twari twararenganye kuko abagenzi bagendaga batwicaye hejuru, kandi abashoferi bakorera muri uyu muhanda gutendeka babigize umuco. Bose muzabigishe babicikeho.”

Uyu mushoferi Karangwa nyuma yo gucibwa amande y’amakosa yakoze yasabye imbabazi avuga ko atazongera.

Yaravuze ati:”Ibi bimbereye isomo sinzongera gutendeka no gukora andi makosa, kandi ndagira inama bagenzi banjye kubahiriza amategeko, kuko igihugu cyacu kitihanganira abatayubahiriza.”

Polisi y’u Rwanda iramenyesha abo batendeka ko kurenza umubare w’ abagenzi mu modoka bitemewe, kuko umuntu wese ubikoze aba yishe amategeko, kandi akwiye kubihanirwa.





Tanga igitekerezo kuri iyi nkuru



Igitekerezo