Perezida Trump n’umugore we basanzwemo COVID-19

Perezida wa Leta zunze ubumwe za Amerika, Donald Trump yatangaje ko we n’umugore we Melania Trump babasanzemo icyorezo cya COVID-19 kandi ubu bagiye mu kato.

Bwana Trump w’imyaka 74 yatangaje aya makuru kuri Twitter. Yanditse ati "Ibi tuzabivamo hamwe".

Ibi ni nyuma y’uko bamwe mu bakorana na we bya hafi babasanzemo iki cyorezo.

Hope Hicks, umujyanama we w’imyaka 31, niwe muntu wa hafi cyane bakorana baheruka gusangamo Coronavirus.

Madamu Hicks yajyanye na we mu ndege ya Air Force One ubwo muri iki Cyumweru yari agiye mu kiganiro mpaka cyabereye muri leta ya Ohio.

Sean Conley, umuganga wa Bwana Trump yasohoye itangazo rivuga ko Perezida n’umugore we "bombi ubu bameze neza, kandi bagiye kuguma mu rugo muri White House kugira ngo bakire".

Iri tangazo rikomeza rivuga ko uyu muganga yizeye ko "Perezida ari bukomeze gukora inshingano ze nta kirogoya mu gihe ari gukira, kandi nzakomeza kubaha amakuru y’uko bizagenda".


Hope Hicks (iburyo)ni umujyanama wa hafi umaze igihe kinini akorana na Trump

Ku wa Kane nijoro, Bwana Trump yari yavuze ko we n’umugore we, w’imyaka 50, bagiye kwishyira mu kato nyuma y’uko Madamu Hope bamusanzemo iyi ndwara.

Yari yanditse nabwo kuri Twitter ati "Hope Hicks, umaze igihe akora cyane ataruhuka na gato, bamusanzemo Covid-19. Birakomeye!

"First Lady nanjye dutegereje ibisubizo. Hagati aho turaba dutangiye kujya mu kato!

Ntibiramenyekana neza niba kuba Bwana Trump bamusanzemo iki cyorezo bizahungabanya ikiganiro mpaka cya kabiri giteganyijwe tariki 15 z’uku kwezi i Maimi muri leta ya Florida.

Leta zunze ubumwe za Amerika nicyo gihugu cyazahajwe na Covid-19 kurusha ibindi ku isi, abantu bagera kuri miliyoni 7.2 barayanduye naho abarenga ibihumbi 200 irabica

Bwana Trump yanenzwe n’abatavuga rumwe nawe kudafata ingamba zikomeye zo kurwanya iki cyorezo no kugifata nk’icyoroshye, ibyo we yahakanye. Kenshi yabonetse atambaye agapfukamunwa.

Kuva yaboneka ku isi mu ntangiriro z’uyu mwaka, abantu barenga miliyoni 34 babasanzemo Covid-19, abarenga miliyoni imwe yarabishe, nk’uko bivugwa na kaminuza ya Johns Hopkins yo muri USA.


Donald n’umugore we Melania Trump

HITIMANA Apollinaire yabuze umurenganura ku ifoto yemeza ko ari iye iri ku Rwibutso rwa Jenoside rwa Kigali ruri ku Gisozi nk’Interahamwe ruharwa:





Tanga igitekerezo kuri iyi nkuru



Igitekerezo