Paccy nta cyaha yakoze, ni ikosa – Depite Frank Habineza

Depite Frank Habineza yatangaje ko Umuraperikazi Oda Paccy nta cyaha yakoze ahubwo ibikorwa bye bigize ikosa bityo ko adakwiye gukomeza kwamaganwa.

Abitangaje nyuma y’aho kuri uyu wa Kabiri, Paccy asohoye ifoto yamamaza indirimbo ye nshya yise Ibyatsi. Abantu benshi baramunenze, bavuga ko uburyo ikoze ihabanye n’ibigize umuco nyarwanda.

Kuri iyo foto yabanje kwandika ‘IBYA’ ubundi ‘TSI’ ayishyira munsi, ibintu byateye benshi kwibaza impamvu. Uretse uburyo amagambo yanditse, hariho n’ifoto y’umukobwa imugaragaza ikibuno.

Kuri uyu wa Gatatu, Umuyobozi w’Itorero ry’Igihugu, Bamporiki Edouard, yamwambuye izina ry’ubutore, kubera imyitwarire ye inyuranyije n’umuco w’ubutore.

Mu itangazo yashyize ahagaragara rigira riti “Nshingiye ku bubasha mpabwa n’Umutoza w’Ikirenga wandagije Itorero; ndamenyesha Abanyarwanda ko uwari waratojwe agahabwa izina ry” ‘Indatabigwi icyiciro cya kabiri’ Uzamberumwana Odda Paccy; yambuwe izina ry’ Ubutore, kubera ko imyitwarire ye inyuranye n’umuco w’ubutore yari yaratojwe ndetse ihabanye n’imihigo yagiranye nabo bahuje izina ry’ubutore.”

JPEG - 92.1 kb

Depite Frank Habineza yavuze ko Paccy adakwiye gukomeza kwamaganwa nyuma yo kwamburwa izina ry’ubutore.

Abinyujije ku rukuta rwe rwa Twitter yagize ati “Umuraperi Uzamberumwana Oda Paccy, nta cyaha yakoze, ni ikosa gusa kandi nta mpamvu yo gukomeza kumuhutaza yamaganwa.”

“Ntibikwiye ko afatirwa ibindi bihano birenze ibyo kumukura mu ntore. Abasaba ko ibihangano bye bihagarikwa natwe tubasabye kudakomeza.”

Habineza atangaje ibi nyuma y’aho abantu b’ingeri zinyuranye bavuze ko ibyo yakoze bidakwiye, ko ndetse akwiye guhwiturwa.

Perezida w’Urugaga rw’Abahanzi, Intore Tuyisenge, yabwiye IGIHE ko ibyo Paccy yakoze “bihabanye cyane n’indangagaciro twatorejwe mu itorero ry’igihugu zikwiriye kuranga umunyarwandakazi muri rusange”.

Ingabire Marie Immaculée, umwe mu nararibonye ukunda gutanga ibitekerezo adaca ku ruhande, yahereye ku mwanzuro wa Komisiyo y’Itorero maze agira ati “Bakoze cyane!”

“Nawe ndebera iriya foto yashyizeho, ngo ni ifoto iherekeza indirimbo ye! Koko mwa bana mwe, turimo turarwana n’inda z’abangavu, turimo turarwana n’indangagaciro z’Abanyarwanda zatakaye, umuntu agasohora biriya bintu!”

Paccy yabwiye IGIHE ko ntacyo yatangaza ku mwanzuro yafatiwe wo kwamburwa ubutore, ko azabanza akabitekerezaho.

Ati ‘‘Indirimbo irasohotse, ndibaza aho imico mibi yavuzwe iri. Icyo navuga ni uko bidakwiye ko hagira uhubuka atarumva ikintu. Ibijyanye no kwamburwa ubutore nzabivugaho mu buryo bwihariye maze gutuza.’’





Tanga igitekerezo kuri iyi nkuru



Igitekerezo