OLUCOME isaba Leta y’u Burundi kutigiza nkana kuri Covid-19

Hashize igihe ibihugu byinshi kimwe n’imiryango yita ku buzima binenga ubutegetsi bw’u Burundi kutita ku kurinda abaturage icyorezo cya Covid-19 n’ubu kigihangayikishije isi ahanini kubera kudashyiraho ingamba zigaragara mu gufasha abanyagihugu kwirinda no kurinda abandi, bigashimangirwa n’abantu bakunze kugaragara bihagarariye mu kivunge uretse no mu myiyamamazo y’abakandida mu matora aherutse mu gihugu.

Ishyirahamwe ritegamiye kuri leta rigamije kurwanya ruswa n’isesagurwa ry’umutungo w’igihugu mu Burundi, Olucome rinenga leta ko ititaye ku cyorezo, rivuga ko "n’ingamba zidahagije zari zarafashwe zitagikurikizwa n’Abarundi, n’abashinzwe gutuma zikurikizwa".

Iri shyirahamwe rivuga ko amatangazo ya Minisiteri y’Ubuzima kuri iki cyorezo "nta buryo na bumwe yakwizerwa", kandi ko ritabona iyi Minisiteri ivuga kenshi umubare w’abanduye n’ingamba leta yafashe.

Mu itangazo wasohoye uyu munsi kuwa Kabiri, Olucome ivuga ko "bibi kurushaho abategetsi bakorera abaturage ntacyo bavuga [kuri iki cyorezo] mu butumwa bagenera abaturage".

Ku bivugwa na Olucome, umuvugizi wa Guverinoma y’u Burundi yasubije mu nyandiko ko "Guverinoma idasubiza iyo ibisabwe isubiza kuri ’Programme’.

Ni mu gihe Leta nyirizina ntacyo iratangaza kuri ibi.

Mu Burundi, mu matangazo yatanzwe na Minisiteri y’Ubuzima biboneka ko hamaze kuboneka abantu 62 banduye Coronavirus na 33 bayikize.

Mu kwezi gushize kwa Gatanu, Minsiteri y’Ubuzima mu Burundi yatangazaga rimwe mu cyumweru imibare mishya n’amakuru kuri Coronavirus.

Muri ayo matangazo biboneka ko hamaze gufatwa ibipimo byose hamwe bisatira 1,000.

Olucome ivuga ko ihereye ku itangazo riheruka gutwangwa ibona amakuru "atangazwa ashobora kuba ari kure y’ukuri kw’ibyo Abarundi batekereza", igasaba leta y’u Burundi "kureka kwigiza nkana (kwizimagiza) imbere y’icyorezo kiri kwica abantu ku isi".


Mu Burundi abaturage bakunze kugaragara bihagarariye mu kivunge ibya Covid-19 ntacyo bibabwiye cyane ko na Leta ntacyo isa nk’ikibyitayeho

Ingabire agomba gupfa cyangwa akicwa, ibikubiye mu ibaruwa yandikiwe Sena ya Amerika:





Tanga igitekerezo kuri iyi nkuru



Igitekerezo