Nyuma y’umuti’, Madagascar igiye kugerageza n’urukingo rwa Covid-19

Perezida wa Madagascar yatangaje ko iki gihugu kigiye gutangira kugerageza urukingo rwa Coronavirus rukoze mu cyatsi cya Artemisia.

Perezida Andry Rajoelina yavuze ko iryo gerageza rizatangira mu cyumweru gitaha.

Yashishikarije kandi abaturage ba Madagascar gutera iki giti cya artemisia.

Bwana Rajoelina yavuze ko ari kuvugana n’abahanga muri siyansi bo muri Amerika bazafasha muri ubwo bushakashatsi.

Artemisia niyo yakozwemo umuti witwa Covid-Organics, Bwana Rajoelina akaba yavuze ko iki gihugu kiri gusaba ishami rya ONU rishinzwe ubuzima ku isi, OMS/WHO, ngo ryemeze uwo muti.

Mu itangazo WHO yoherereje BBC dukesha iyi nkuru, ivuga ko itaremera "uburyo bwo kwivura hakoreshejwe imiti iyo ariyo yose...mu gukingira cyangwa kuvura Covid-19".

Covid-Organics, umuti wakozwe muri Madagascar umaze koherezwa mu bindi bihugu bya Afurika byawutumije birimo Guinea-Bissau na Equatorial Guinea.

Perezida John Magufuli wa Tanzania na we yavuze ko bazohereza indege muri Madagascar ikabazanira kuri uwo muti.

Leta Zunze Ubumwe za Amerika, ziheruka kwemeza umuti witwa remdesivir, ubundi wakorewe kuvura Ebola ko ari umuti wakoreshwa mu kuvura Covid-19.

Kugeza ubu, iki cyorezo nta muti wemewe n’urwego rushinzwe ubuzima ku isi uraboneka.


Perezida Rajoelina ubwo yerekanaga umuti bakoze wa Covid-19





Tanga igitekerezo kuri iyi nkuru



Igitekerezo