Abavuga ibi, ni abari mu itsinda rigizwe n’urubyiruko rwaretse kunywa no gukoresha ibiyobyabwenge, barangije kwiga amashuri yisumbuye ndetse n’abayakicirije bo mu Murenge wa Rusenge.

Burindwi Francois afite imyaka 27, ni umwe muri urwo rubyiruko. Avuga ko yari yarabaswe n’ibiyobyabwenge ariko kuba yarabiretse akwiye gushaka ukundi yakwiteza imbere.

Yagize ati ”Njyewe nanywaga kore, n’urumogi cyane! Ariko nyuma navuga ko ari Imana yamfashije kubisezerera burundu. Ubu rero njyewe na abagenzi banjye, icyo twifuza ni uko twashyirirwaho uburyo twakwigamo imyuga.”

Kuri iki kibazo, umuyobozi w’akarere ka Nyaruguru Habitegeko Francois, avuga ko hari gahunda yo guhugura urubyiruko ndetse bakanabahuza n’ibigo by’imari.

Ati ”Turashima aba bana baretse gukoresha ibiyobyabwenge. Nibahumure, hari uburyo twabashyiriyeho bwo kubahugura, no kubahuza n’ibigo byimari bizajya bibafasha kubona inguzanyo bagura ibikoresho kuko bazaba baribumbiye mu matsinda.”

Uretse kuba abagize iri tsinda bahura bakizigama, banagira n’indi gahunda yo guhuriza imbaraga hamwe, bagafasha abaturage mu bibazo bitandukanye bahura na byo birimo nko kubakira amazu n’ubwiherero abatishoboye, gutunganya uturima tw’igikoni, gufasha mu kurwanya ibiyobyabwenge ndetse no kurwanya amakimbirane mu miryango.

Iri tsinda ry’uru rubyiruko, rikaba rigizwe n’abasaga 150.

---

---