Nyamagabe: Abatwika amatafari barashinjwa gukoresha abana imirimo ivunanye

Abaturage bo mu Karere ka Nyamagabe baravuga ko hari bamwe muri ba rwiyemezamirimo batwika amatafari bakoresha abana imirimo ivunanye, aho kurengera no kubahiriza uburenganzira bwabo.

Bavuga ko ba rwiyemezamirimo batwika amatafari bifashisha abana bakiri bato mu kazi kabo kugira ngo bayabagereze ahabera ibikorwa byo kubaka inzu zo guturamo.

Nk’uko Radiyo Rwanda yabitangaje, abana 30 bari hagati y’imyaka 9 na 14 bari mu bakora ibiraka cyo gutunda amatafari ya mpunyu, bayakura mu birometero bitatu.

Bavuga ko muri aka kazi ko guterura amatafari, umuto muri bo yikorera ku mutwe agera ku munani ayakura aho atwikirwa ayajyana ahaba hari kubakwa inzu zo guturamo kandi ku munsi byibuze bayikorera inshuro 10.

Umwe muri bo ufite imyaka 13 yagize ati “Ubu maze gutwara amatafari 20, ndatwara naruha ayo ngejejemo bakaba ariyo bampembera, ku munsi nkorera amafaranga 200.”

Aba bana bakoreshwa iyi mirimo mu gihe usanga hari n’abantu bakuru baba bimwe iyo mirimo.

Umubyeyi umwe yagize ati “Nk’ubu naje gushaka akazi ariko noneho nahageze nkurikije ko bari bambwiye ngo nzaze bakampe ariko nyir’ukugatanga aranga.”

Umuyobozi w’Akarere ka Nyamagabe, Uwamahoro Bonaventure, we avuga ko icyo kibazo bakize kandi batangiye gushyira imbaraga mu kukirwanya.

Yagize ati “Kiriya kibazo cyagaragaye muri Tare aho hadutse imirimo y’abantu benshi batwika amatafari bakayatwikira mu ngo bigatuma noneho bakoresha n’abana mu kuyatunda bayajyana kuyagurisha, ibyo byose turabizi turi kubifatira ingamba kugira ngo tubirwanye.”

Yongeyeho ko iyi gahunda yo kurwanya imirimo ikoreshwa abana ubwo bahuraga Perezida Paul Kagame, bamwemereye ko bagomba kuyica ku buryo bari gushyiramo imbaraga nyinshi mu kuyirwanya.

Akarere ka Nyamagabe, ni kamwe mu kagaragaramo igice kini kigizwe n’amashayamba ku buryo ari bimwe mu bituma habera ibikorwa byinshi byo gutwika amakara n’amatafari.





Tanga igitekerezo kuri iyi nkuru



Igitekerezo