Ntamuhanga Yussouf warokoye Minisitiri Nyirasafari muri Jenocide yagabiwe inka

Ntamuhanga Yussouf wo mu Karere ka Rubavu mu Ntara y’Iburengerazuba yagabiwe inka y’Ineza n’urubyiruko rwarokotse Jenocide yakorewe abatutsi rwibumbiye muri AERG-GAER nyuma yo kuba yararokoye abasaga 20 harimo na Minisitiri w’Uburinganire n’Iterambere ry’Umuryngo,Nyirasafari Esperance.

Kuri uyu wa Gatatu tariki ya 03 Mata 2018, ubwo urubyiruko rwarokotse Jenocide yakorewe abatutsi muri Mata 1994,rwakoraga ibikorwa by’umunsi wa 2 w’ibikorwa bya AERG-GAERG week baremeye abarokotse Jenocide ndetse baha inka y’Ineza Ntamuhanga wagize uruhari mu kurokora abatutsi bahigwaga muri Jenocide yakorewe abatutsi muri Mata 1994 aho avuga ko yabifashijwemo n’amafaranga yari afite ndetse n’umutima w’impuhwe yari yarakuranye.

Ntamuhanga yussouf yagize ati, “Nakoranaga n’abashinzwe umutekano baba abo mu Rwanda ndetse no muri Congo nkabaha amafaranga kuko muri icyo gihe nari nyafite nkayaha abapolisi n’abasirikare babaga bari ku mipaka ariko bamwe ba kananiza”.

Avuga uko yarokoye Minisisiri w’Uburinganire n’Iterambere ry’Umuryango Nyirasafari Esperance yavuze ko bitari byoroshye kuko byasabye kujya yambutsa abantu muri boot y’imodoka ndetse rimwe na rimwe akavuga ko hari aho byamusabaga kubwira abarinze umupaka ko imfunguzo za boot yazitaye.

Ntamuhanga yagize ati, “Hari abo nakuye mu bwihisho bamwe bari mu muvure mbashyira muri boot(butu) y’imodoka yanjye ndavuga ngo umbwira ngo mfungure ndamubwira abanze anyice ariko ngihumeka ntawe ureba muri boot, cyangwa se batwike imodokari, naragiye ngeze ku rusengero rw’abadive barambwira ngo fungura, narabyanze umuntu wari uhari bitaga Safari yarangoye cyane ariko kuko bashakaga amafaranga nabahaye ibihumbi 20 barandeka ndakomeza”

Yongeraho ati, “Naragiye ngeze imbere ku yindi bariyeri y’uwitwaga Mabuye barangora cyane ariko mbasaba ko babwira chef wabo akaza tukavugana kuko ntashoboraga gufungura boot, yaraje turavugana ambwira ati abo bahungu banjye baba bari mu kazi byaba byiza urebye icyo ubaha, mbaha ibihumbi 70 barandeka ndagenda birangira mbambukije mbageza muri congo”.

Ntamuhanga Yussouf wahawe inka y’Ineza yari umuvunjayi ukomeye mbere ya Jenoside yarokoye abatutsi bari hagati ya 20-22 abikoresheje kuba yari yarazengurutse amahanga mbere ya Jenocide azi kubana icyo aricyo kuko yajyaga ahura n’Abanyarwanda hanze bakaganiriza bagasabana ariyo mpamvu atigeze akurana umutima mubi.

Ntamuhanga avuga ko ibyo yakoze muri Jenocide byamufashije kongera inshuti kuko kuri ubu bahura bakaganira bagasangira ndetse na Minisitiri Nyirasafari Esperance bajya baganira nta kibazo bagirana.

PNG - 801.5 kb
Minisitiri w’Uburinganire n’Iterambere ry’Umuryngo,Nyirasafari Esperance ni umwe mu barokowe na Ntamuhanga Yissouf warokoye abagera kuri 20
PNG - 765.6 kb
Ntamuhanga Yissouf wahawe inka avuga uko yarokoye abahigwaga harimo na Minitiri Nyirasafari Esperance
PNG - 897.9 kb
Ntamuhanga Yussouf yagabiwe inka y’ineza n’urubyiruko rwarokotse Jenocide yakorewe abatutsi rwibumbiye muri AERG-GAER nyuma yo kuba yararokoye abasaga 20 harimo na Minisitiri Nyirasafari Esperance

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo