Ntabwo dukwiye kuryama ngo dusinzire abana bacu bari kwangizwa-Mukabalisa

Perezida w’Umutwe w’Abadepite, Mukabalisa Donatille, yasabye abanyarwanda guhagurukira ikibazo cy’abana basambanywa gikomeje gukaza umurego, avuga ko ntawe ukwiye gusinzira kitarakemuka.

Yabitangaje kuri iki Cyumweru tariki 25 Ugushyingo ubwo hatangizwaga ubukangurambaga bw’iminsi 16 bwo kurwanya ihohoterwa rikorerwa abagore n’abakobwa.

Ubu bukangurambaga bubaye mu gihe imibare y’ubushinjacyaha igaragaza ko kuva muri Nyakanga 2017 kugeza muri Kamena 2018 bwakiriye ibirego 2996 by’abana basambanyijwe.

Ibyo byiyongera ku bana ibihumbi 17 bari hagati y’imyaka 15 na 19 batewe inda zitateguwe mu mwaka wa 2016.

Mukabalisa yavuze ko imibare iteye inkeke ku buryo ikwiye guhangayikisha buri wese.

Ati “Raporo zitandukanye zigaragaza ko imibare y’abangavu baterwa inda igenda yiyongera mu turere twose, twaba utwo mu mijyi ndetse no mu cyaro kandi ni ikintu kibabaje. Ntabwo dukwiye kuryama ngo dusinzire mu gihe abana bacu bakomeje kwangizwa. Nta gikozwe, ntaho twaba tuganisha igihugu cyacu. Ni ngombwa ko duhagurukira hamwe tukabirwanya twivuye inyuma.”

Yavuze ko uruhare runini bituruka ku babyeyi bategera abana babo ngo babaganirize ku buzima bw’imyororokere n’ibindi.

Icyakora yananenze urubyiruko rutumvira inama z’abarezi n’ababyeyi, rukagendera mu gakungu n’ingeso mbi nko kureba flime z’urukozasoni, kutanyurwa n’ibindi.

Minisitiri w’Uburinganire n’Umuryango, Solina Nyirahabimana, yasabye by’umwihariko ababyeyi bafite abana basambanyijwe kutabyihererana cyangwa ngo bashake kumvikana n’abakoze icyaha.

Yagize ati “Ababyeyi bakunze kugira ubwiyunge ndetse n’ibiganiro n’uwahohoteye umwana ndetse rimwe na rimwe bagashaka no kubashyingira umwana ataruzuza imyaka, icyaha bakakinyura ku ruhande. Nta mishyikirano iba hejuru y’icyaha.”

Umunyamabanga Mukuru w’Urwego rw’Igihugu rushinzwe Ubugenzacyaha,Col Ruhunga Jeannot, yashimangiye ko mu bukangurambaga bamazemo iminsi, hari imiryango basanze yarasambanyirijwe umwana, igahitamo kubihisha no kumvikana n’abakoze icyaha.

Yavuze ko ibyo bitiza umurindi abasambanya abana, bigatera uwasambanyijwe guhungabana.

Cyuzuzo Jeannine w’imyaka 28 utuye mu Karere ka Gasabo asanga kugira ngo gusambanya abana bicike, hakwiriye ubukangurambaga no mu rubyiruko, rukiga kunyurwa na bike rufite.

Ati “Icyakorwa ni uko buri mwana wese yanyurwa n’ubushobozi bw’ababyeyi, icyo batabashije kumuha akaba akiretse, yaba hari icyo abona ababyeyi be bashoboye akabegera akakibasaba.”

Umuntu wese usambanyije umwana utarageza imyaka 14 ahanishwa igihano cya burundu. Iyo umwana wasambanyijwe ari hagati y’imyaka 14 na 18, uwakoze icyo cyaha ahanishwa gufungwa imyaka iri hagati ya 25 na 30.

umubavu.com





Tanga igitekerezo kuri iyi nkuru



Igitekerezo