Nta kindi itangazamakuru ryabamarira uretse kubandagaza-Meya wa Rusizi

Umuyobozi w’ Akarere ka Rusizi, Harerimana Fredaric aravugwaho kuba amaze iminsi yagisha abaturage itangazamakuru ababwira ko itangazamakuru ari iryo kubandagaza gusa nta kindi ryabamarira.

Ubu butuma uyu muyobozi amaze iminsi abuha abaturage mu nama zitandukanye aba yahuriyemo nabo mu Mirenge ya Bugarama, Bweyeye na Butare nkuko Umuryango banditse iyi nkuru babivuga.

Ati “Ko mwahuye n’ibiza, ababashije kubatabara si abayobozi? Abayoboz nibo batugejejeho raporo natwe tuzigera ku nzego zose uko twicaye ahangaha. Ufite ikibazo wese cyaba icy’ akarengane, cyaba icy’ imibereho, cyaba icy’ ubushobozi, narebe umuyobozi w’ Isibo. Mu mudugudu aba bafata amafoto n’ ibiki…ntabe aribo wumva ko bari bukemure ikibazo, nubona umunyamakuru ukajyaho ukaganya sinkeka ko ari buze gukemura ikibazo cyawe.”

Yakomeje agira ati “…uyu munyamakuru nta kindi agukorera,usibye kugushyira kuri televiziyo akwerekana uri gusaba, isi yose ikubone.”

JPEG - 72.8 kb
Umuyobozi w’ Akarere ka Rusizi, Harerimana Fredaricyihanangiriza abaturage kutavugisha itangazamakuru


Abaturage baganiriye na KT radio banenze imvugo y’ uyu muyobozi bavuga ko itangazamakuru rigira uruhare mu gutuma ibibazo byabo bikemuka.

Umwe ati “Hari igihe ubona ibintu bitari kugenda neza ukabiyambaza (abanyamakuru) bakaba baza bakumva ikibazo aho cyaturutse…ikibazo riraza rikakivuga kigakemuka nk’ uwo uvuga ngo ntacyo rimaze sinzi icyo yaba ashingiyeho? Kandi Leta iba yararishyizeho ngo ryumvikanishe abaturage bumve ngo nk’ aha Rusizi byagenze gutya…aha njyewe sinamushima kabisa”

Mugenzi yavuze ko bitaba aribyo kubuza abaturage kubwira ibibazo byabo abanyamakuru. Ati “Ntabwo byaba aribyo kubera ko itangazamakuru rifitiye akamaro kanini abaturage, iyo umuntu afite ikibazo itangazamakuru rikabimenya uwo muntu ikibazo cye kirakemuka”

Mu buryo bwo kumenya niba atari ubutumwa bwa Meya Harerimana bwumvikanye uko atabutanze, ku murongo wa telephone Umunyamakuru w’Umuryango yahamagaye Meya Harerimana Fredaric amaze kumva icyo umunyamakuru agiye kumubazaho ahita akupa telephone umunyamakuru yongeye kumuhamagara ntiyitaba.

Ubusanzwe mu nshingano z’ itangazamakuru harimo gufasha abaturage kwidagadura, kubamamenyesha ibibera hirya no hino, kubakorera ubuvugizi, kubahuza n’ abayobozi n’ ibindi.

Mu bibazo biri mu karere ka Rusizi harimo kuba abahinzi b’ umuceri bawuhinga wakwera ntibemererwe kuwurya, ikindi ni uko nta muturage wemerewe guhaha muri Repubulika iharanira Demukarasi ya Congo umuceri urenze ibiro bibiri. Abaturage babwira itangazamakuru ko ibi bibabangamiye kandi ko babitegetswe n’ ubuyobozi.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo