Nta gushidikanya abagore barusha abagabo-Obama

Barack Obama wabaye Perezida wa 44 wa Leta Zunze Ubumwe za Amerika avuga ko iyaba abagore bayoboraga buri gihugu cyo ku isi, haba impinduka nziza mu nguni z’ubuzima bwose no mu musaruro.

Ubwo yari muri Singapore, Obama yavuze ko abagore na bo atari ba ntamakemwa, ariko bidashidikanywaho ko barusha abagabo. Aha yavugaga mu gukora ibyiza.

Obama yavuze ko ibibazo byinshi ku isi biterwa n’abantu bakuru, cyane cyane abagabo, ari na bo benshi ku myanya y’ubutegetsi.

Obama yavuze ko ubwo yari Perezida wa Amerika yatekereje uko isi yaba imeze iramutse iyoborwa n’abagore gusa.

Ati "Bagore rero, nagira ngo mbabwire ko mutari ba ntamakemwa, ariko icyo navuga neruye ni uko bidashidikanywaho muturuta [abagabo]".

Yakomeje ati "Nzi neza ko ibihugu byose by’isi bibaye biyoborwa n’abagore mu myaka ibiri mwabona impinduka nziza zikomeye hose ku isi muri buri kintu cyose... imibereho n’umusaruro".

Abajijwe niba atekereza kuzasubira guhatanira ubutegetsi, yavuze ko yemera guhigama ku butegetsi iyo igihe cyabyo kigeze.

Ati "Iyo urebye isi ukabona ibibazo biyugarije ubona ko ari abantu bakuru, kenshi abagabo, batava mu nzira.

"Ni ingenzi ko abategetsi ba Politiki bagerageza kwiyibutsa ko; uri hariya ngo ukore akazi utari hariya ubuzima bwose, ntabwo uri hariya ngo wumvishe abandi ko ariko wowe ushoboye unakomeye".

Obama yayoboye Leta Zunze Ubumwe za Amerika Manda ebyiri hagati ya 2009 na 2017.

Kuva yava muri White House, we n’umugore we Michelle bashyizeho ikigo Obama Foundation gifasha urubyiruko rufite impano zinyuranye mu gutegeka.

Mu cyumweru gishize, bombi bari kumwe i Kuala Lumpur muri Malaysia mu gikorwa cyateguwe n’iki kigo cyabo.


Barack Obama i Kuala Lumpur aho yavuze ko abagore barusha abagabo gukora byiza


Michelle na Barack Obama bashinze Obama Foundation iha urubyiruko inama mu by’ubutegetsi

Miss Uwihirwe Yasipi Casimir n’umunyamakuru bahishuye icyatuma batabana:





Tanga igitekerezo kuri iyi nkuru



Igitekerezo