Niyonsenga ’Cyuma Hassan’ wa ISHEMA TV azaburana umwaka utaha

Niyonsenga Dieudonne alias Cyuma Hassan, nyiri Televiziyo ikorera kuri Murandasi yise ISHEMA TV azaburana urubanza rwe mu mizi ku itariki ya 15 Gashyantare 2021, icyemezo umucamanza yatanze nyuma y’iburanisha riheruka yagaragarijemo imbogamizi zitandukanye zirimo nko kuba afunzwe binyuranyije n’amategeko asaba gufungurwa ariko umucamanza akabitesha agaciro.

Ku wa Gatanu tariki ya 04 Ukuboza 2020, nyuma y’amezi hafi atandatu Niyonsenga Dieudonne ’Cyuma Hassan’ afunzwe by’agateganyo iminsi 30, nibwo yaburanye gusa icyo gihe uru rubanza rurasubikwa nyuma yuko uregwa atanze imbogamizi zirimo ko atabashije kubonana n’umwunganira mu mategeko.

Uru rubanza rwa Niyonsenga Dieudonne kandi watangiye aregwa ibyaba bitatu byo gukoresha inyandiko mpimbano, kwiyitiria urwego rw’umwuga no gusagarira abashinzwe umutekano, rwabaye mu gihe UMUBAVU wari ufite amakuru ko ruzaburanishwa ku wa 10 Ukuboza 2020.

Aburana tariki ya 04 Ukuboza 2020, Niyonsenga yarezwe n’ubushinjacyaha icyaha cyo gukubita no gukomeretsa gusa mu gihe yatangiye aregwa ibyaha bitatu byavuzwe haruguru.

Ku wa 19 Kamena 2020 nibwo umucamanza yasomye umwanzuro w’urubanza rwa Niyonsenga Dieudonne wari wajuririye icyemezo cy’umucamanza wa Mbere kimufunga iminsi 30 y’agateganyo, ategeka ko iki cyemezo kidahinduka.

Ni umwanzuro wasomwe mu buryo bw’ibanga kuko UMUBAVU wari wabwiwe ko udasomwa ku wa 19 Kamena 2020 nyamara bigeze ku wa Kabiri tariki ya 24 Kamena 2020 umenya ko wasomwe kuri uwo munsi.

Mu iburanisha riheruka, umucamanza yasomye abaregwa ari bo Niyonsenga Dieudonne uzwi nka Cyuma Hassan akaba nyiri Televiziyo ikorera kuri Murandasi yise ISHEMA TV na Komezusenge Fidele, umushoferi wa Cyuma Hassan.

Mbere y’iburanisha, Niyonsenga Dieudonne waburanishwaga ku ikoranabuhanga ari kuri Gereza ya Mageragere, yabanje kubaza umucamanza niba umwunganira mu mategeko ahari ndetse asaba ko bamumwereka, baramumwereka ari we Me Gatera Gashabana.

Umucamanza yahise abaza Niyonsenga Dieudonne niba icyaha cyo gukubita no gukomeretsa aregwa acyemera, ahawe ijambo atangira avuga ko afunzwe mu buryo bunyuranyije n’amategeko.

Yagize ati "Mfunzwe mu buryo bunyuranyije n’amategeko".

Yagaragaje kandi imbogamizi ahura na zo zirimo kutabonana na Avoka we, kuba hari ibikoresho bye byafatiriwe n’ubushinjacyaha kugeza ubu, ibyo avuga ko birimo n’inyandiko zimushinjura kandi bikaba byarafatiriwe mu buryo bunyuranyije n’amategeko.

Yahise asaba gufungurwa by’agateganyo, gusubizwa ibikoresho bye byafatiriwe n’ubushinjacyaha, gutegeka gereza gushyira imyanzuro y’urukiko muri sisiteme no gutegeka gereza kumwemerera kuvugana n’umwunganira mu mategeko.

Ku kuvugana na Avoka we, Me Gatera Gashabana na we yasabye ko byakorwa kandi akavugana na we mu buryo bw’ibanga.

Gusa ibindi umushinjacyaha yavuze ko by’umwihariko ku bikoresho bye byafatiriwe avuga ko Kamera atari ikintu cyangirika. Aha Niyonsenga yahise avuga ko afite impungenge ko Kamera ye yakwangirika kuko yafashwe mu buryo bunyuranyije n’amategeko.

Ku gutegeka gereza gushyira imyanzuro y’urukiko muri sisiteme, umushinjacyaha yavuze ko byo ari uburenganzira bw’uregwa.

Ku wa 11 Ukuboza 2020, itariki umucamanza yatanze ko aribwo umwanzuro kuri uru rubanza ruzasomwaho, umunyamakuru w’UMUBAVU yageze ku rukiko Rwisumbuye rwa Gasabo kugira ngo akurikirane isomwa ryarwo ariko abwirwa ko rwasomwe.

Mu myanzuro yasomwe, hariko ko umucamanza yategetse ko ibikoresho bya Niyonsenga byafatiriwe n’ubushinjacyaha bisubizwa mu gihe ku mbogamizi zindi yatanze umucamanza yavuze ko ngo nta shingiro zifite.

Ku kuba Cyuma Hassan yari yasabye ko yahita afungurwa by’agateganyo akaba yakurikiranwa adafunze abishingira ku kuba yaravugaga ko afunze binyuranyije n’amategeko,ibi na byo ntibyemewe kuko arakomeza gufungwa.

Umucamanza kandi akaba yarategetse ko urubanza rwe ruzaburanishwa mu mizi ku itariki ya 15 Gashyantare mu mwaka utaha wa 2021.

Niyonsenga Dieudonne ’Cyuma Hassan’ yakunze kugaragara akora inkuru zivuganira abaturage bafite ibibazo bitandukanye ataretse no kunenga abayobozi batuzuza inshingano zabo uko bikwiye.

Andi makuru ku rubanza rwa Cyuma Hassan wa ISHEMA TV urayiyumvira muri iyi Video:





Tanga igitekerezo kuri iyi nkuru



Igitekerezo