Perezida wa Nigeria, Muhammadu Buhari, yahakanye amakuru yavugaga ko igihe yarwaraga ashobora kuba yarapfuye hagakorwa undi muntu usa nawe (clone).

Abinyujije ku rukuta rwe rwa Twitter, ku Cyumweru Buhari yavuze ko yanyomoje aya makuru yuzuyemo ubujiji ubwo yari mu nama n’abanya-Nigeria batuye muri Pologne.

Ati “Kimwe mu bibazo nabajijwe uyu munsi ubwo nari mu nama n’abanya-Nigeria muri Pologne ni uko naba narakozwemo undi muntu cyangwa atari byo. Ibi binyoma byuzuye ubujiji ntibitunguranye kuko ubwo najyaga mu kiruhuko cy’uburwayi umwaka ushize hari abizeraga ko napfuye.”

Mu 2017, Perezida Buhari yagiye yerekeza kenshi mu Mujyi wa Londres mu Bwongereza kwivuza, ku buryo hari n’ubwo yigeze kumarayo amezi arenga atatu.
CNN ivuga ko icyo gihe hatangiye gukwirakwira ibihuha ku buzima bwa Perezida, aho hari n’abatangiye kuvuga ko yitabye Imana.

Nk’uko we Buhari ubwe yabyitangarije, ngo ibi binyoma byatumye bamwe batangira gusaba Visi Perezida, Yemi Osinbajo kuba yamusimbura.

Ati “Ibi byamuteye ikimwaro cyane, twabiganiriyeho ubwo yazaga kunsura ntangiye koroherwa. Nahamiriza mwe mwese ko uyu ari njye nyawe. Mu minsi mike muri uku kwezi nzizihiza isabukuru y’imyaka 76, kandi ndacyakomeye.”

Umuvugizi wa Perezida, Garba Shehu, yavuze ko Buhari wajyanywe muri Pologne n’Inama ya 24 y’Ishami rya Loni rishinzwe guhangana n’imihindagurikire y’ikirere (COP24), yasubije kuriya nyuma yo kubazwa niba ataba ari umunya-Sudani, Jubril bivugwa ko basa cyane.

Iyi nama ya COP24 Buhari watorewe kuyobora Nigeria mu 2015 yitabiriye iteganyijwe kuba kuva kuri uyu wa 3-14 Ukuboza mu Mujyi wa Katowice muri Pologne.

Perezida Buhari yahakanye kuba Clone ya Perezida nyawe Abanya-Nigeria bitoreye

@Umubavu.com

---

---