Musanze: Uwari Gitifu wa Cyuve yasabiwe gufungwa imyaka 15

Ubushinjacyaha bwasabiye Sebashotsi Gasasira Jean Paul wahoze ari Gitifu w’Umurenge wa Cyuve mu karere ka Musanze na bagenzi be, gufungwa imyaka 15 n’ihazabu ya miliyoni 5 Frw.

Sebashotsi na bagenzi be bakekwaho gukubita no gukomeretsa abavandimwe babiri tariki ya 13 Gicurasi 2020, babaziza kuba batambaye udupfukamunwa . Batawe muri yombi ku wa 14 Gicurasi 2020.

Ubushinjacyaha bwagaragaje ko kuba abiregura bavuga ko amakosa bakoze bayatewe n’akazi ko kubahiziza amabwiriza bari bahawe n’ababakuriye, ntaho bigaragara ko bari batumwe n’ababakuriye.

Ubushinjacyaha bwavuze ko umuturage yigishwa aho gukubitwa no kumukurubana hasi nk’uko byagaragaye mu mashusho Sebashotsi n’abo baregwa hamwe bafashwe bari gukubita abaturage.

Ubushinjacyaha kandi bwagaragaje ko kuba Gitifu Sebashotsi yaritabajwe n’abaturage ngo abatabare, yahagera akabakubita aho gutabara nabyo bigaragaza umugambi yari afite.

Mu kwiregura, Sebashotsi na bagenzi bavuze ko ibyo bakoze bitabaraga kuko bari basagariwe n’abaturage. Ubushinjacyaha bwabihakanye buvuga ko ahubwo ko abakubiswe bagerageje gucika Sebashotsi na bagenzi be bakabakurikira bakabakubitira aho bari babahungiye.

Ubushinjacyaha bwasabye ko bahanishwa igihano cy’imyaka 15 n’ihazabu ya miliyoni eshanu.

Abaregwa babajijwe icyo bavuga ku bihano basabiwe, basabye urukiko gukoresha ubushishozi basanganywe bakabarenganura. Sebashotsi we yavuze ko yemera icyaha yakoze akanagisabira imbabazi zimuvuye ku mutima urukiko n’umuryango yahemukiye kuko atabikoze yabigambiriye, asaba ko urukiko rwazasuzuma uburyo icyaha cyakozwe rugafata icyemezo gikwiye.

Muri uru rubanza kandi haregewe indishyi z’akababaro kuri Nyirangaruye Clarisse wakubitiwe mu ruhame akambikwa n’ubusa, ndetse akanababazwa cyane kandi akanandagazwa ko yanduye agakoko ka SIDA. Babihuza n’ibyo Manishimwe na Nyirangaruye batakaje bivuza, batanga ibirego no kwishyura abunganizi babo, basanga hakwiye gutangwa indishyi ihwanye na miliyoni 30.

Abaregwa basabye urukiko ko naho rwazasuzuma uburemere bw’izi ndishyi bukabona ko nta shingiro zifite, kuko nta bimenyetso bigaragaza uko yandagajwe, yambitswe ubusa n’ibindi.

Umucamanza amaze kumva ibivugwa n’impande zombi, yavuze ko ruzasomwa ku wa 30 Nyakanga 2020 saa munani.


Bamwe mu baturage bakubiswe na Gitifu Sebashotsi basabye indishyi za miliyoni 30 Frw

SRC: Igihe

Umva byinshi ’Majoro Sankara’ yahishuriye mu rukiko, Urubanza rw’’IBIFI BININI’, abasore b’i Rusizi na Nyamasheke baka abakobwa amafaranga ngo babarongore bashobora kuba bagiye guhura n’uruva gusenya n’andi makuru menshi utapfa gusanga ahandi ni k’UMUBAVU TV ONLINE:





Tanga igitekerezo kuri iyi nkuru



Igitekerezo