Musanze : Polisi yafunze umwana ukekwaho gusambanya ihene

Umwana w’umuhungu w’imyaka 14 wo mu Murenge wa Muko mu Karere ka Musanze, yatawe muri yombi nyuma yo gukekwaho gusambanya ihene y’abaturanyi ikaramburura.

Uyu mwana wo mu muryango wo mu Mudugudu wa Kigasa, Akagari ka Mburabuturo mu Murenge wa Muko, yatawe muri yombi na Polisi y’u Rwanda nyuma yo kumukekaho gufata ku ngufu iriya hene y’umuturanyi bikayiviramo kuramburura.

Uyu mwana ubu ufungiye kuri station ya Polisi ya Muhoza, yafashwe kuri uyu wa Mbere tariki 17 Gicurasi 2021 mu gihe ihene akekwaho gusambanya yaba yarabikoze tariki 13 Gicurasi 2021

Ngo akimara gufata ku ngufu iriya hene yahise atoroka arabura ariko umugore w’imyaka 51 nyiri iriya hene yahise ajya kwitabaza inzego z’ibanze azigezaho ikirego cye ari na bwo zatangiraga gushakisha uriya mwana.
Yaba uyu mwana ndetse n’ababyeyi bamaganira kure ibyo kuba uyu mwana wabo yarasambanyije iriya hene y’umuturanyi wabo.

Murekatete Triphose uyobora Umurenge wa Muko, avuga ko na bo bamenye ariya makuru bayakuye mu binyamakuru ariko nyuma baza kuyamenya by’impamo ubu ikibazo kikaba kiri mu maboko y’inzego z’ubutabera.

Yagize ati “Ubu harimo gukorwa iperereza n’inzego zibishinzwe. Turasaba iriya miryango kwirinda amakimbirane yahavuka kandi turanayegera tuyiganize, bategereze ibizava mu iperereza kugira ngo urengana arenganurwe.”

ITEGEKO RIVUGA IKI ?

Mu gitabo cy’Itegeko riteganya ibyaha n’ibihano

Ingingo ya 142 : Gukora igikorwa gishingiye ku gitsina ku nyamaswa

Umuntu wese ukora igikorwa gishingiye ku gitsina ku nyamaswa, aba akoze icyaha. Iyo abihamijwe n’urukiko, ahanishwa igifungo kitari munsi y’amezi atandatu (6) ariko kitarenze umwaka umwe (1).

Umuntu wese, mu buryo ubwo ari bwo bwose, utuma undi akora igikorwa gishingiye ku gitsina ku nyamaswa, ahanishwa igihano cy’igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenze miliyoni eshanu (5.000.000 FRW).

IVOMO:UKWEZI.RW





Tanga igitekerezo kuri iyi nkuru



Igitekerezo