Mu Rwanda  habonetse amoko mashya ya Covid

Amoko mashya ya Covid-19 yabonetse bwa mbere mu Bwongereza no muri Africa y’Epfo yabonetse no mu bipimo byafashwe mu Rwanda, nk’uko byemejwe na minisitiri w’ubuzima.

Inzobere mu buzima zivuga ko amoko mashya ya Covid-19 ariyo ari gutera ubwiyongere bw’abandura n’impfu ahatandukanye ku isi.

Dr Daniel Ngamije, minisitiri w’ubuzima mu Rwanda yabwiye igitangazamakuru cya leta, RBA, ko ubu bwoko bushya babonye mu cyumweru gishize bwabonetse mu bipimo byafashwe mu mezi ashize.

Ubwoko bwa Covid-19 bwabonetse mu mpera za 2020 mu Bwongereza bwiswe B.1.1.7, OMS/WHO ivuga ko bwandura vuba kurusha andi moko ya Covid.

Mu kwezi kwa mbere 2021, inzobere mu buzima mu Bwongereza zavuze ko ubu bwoko ari bwo buri inyuma y’ubwandu n’impfu byiyongereye muri icyo gihugu.

Dr Ngamije yavuze ko mu bipimo bigera kuri 400 byafashwe ku bantu banduye hagati y’ukwezi kwa 10/2020 n’ukwezi kwa kabiri 2021 ariho babonye ayo moko mashya y’iyi virus.

Yavuze ko ibipimo bibiri babisanzemo buriya bwoko bwo mu Bwongereza, naho ibipimo 10 bakabisangamo ubwoko bwabonetse muri Africa y’Epfo bwiswe B.1.351.

Dr Ngamije yavuze ko ayo moko yabonetse ku bipimo by’abantu bari bavuye mu mahanga, kandi bashyizwe mu kato kugeza bakize iyi virus.

Yagize ati: "Ni abo bo hanze gusa twabonye bafite ubwo bwoko, abo mu gihugu baracyafite ya virus isanzwe, ntabwo turabona ubu bwoko imbere mu gihugu mu Banyarwanda."

Mu kwezi kwa mbere, Ubwongereza bwashyize u Rwanda ku rutonde rw’ibihugu ababivuyemo batemerewe kujyayo kubera impungenge za buriya bwoko bwa Covid bwo muri Africa y’Epfo.

Dr Ngamije yavuze ko 97% by’inkingo, zirenga gato doze 340,000 zahawe u Rwanda, zimaze guterwa abantu mu gihugu.

U Rwanda rwakiriye inkingo za AstraZeneca na Pfizer zivuye muri gahunda ya Covax.

Yavuze kandi ko mu byumweru bicye biri imbere bateganya kubona izindi doze z’inkingo, zirimo izizagurwa na leta hamwe n’izaboneka muri gahunda ya Covax.

Kugeza ubu abamaze gukingira batewe doze ya mbere, bakaba bategereje kubona doze ya kabiri, nk’uko biteganywa kuri izi nkingo z’ariya moko.

Mu Rwanda, mu bipimo birenga miliyoni imwe byafashwe, abantu hafi 21,000 bamaze gutangazwa ko banduye Covid-19, abo imaze kwica ni 290, nk’uko bivugwa na minisiteri y’ubuzima.





Tanga igitekerezo kuri iyi nkuru



Igitekerezo